Documentario tocante Alice van Romondt titula ‘I CAN’T BE MOE’ a recientemente keda presenta na Curacao International Film Festival cu hopi bon acogida y reaccion.
Ora a haya su “Zilveren Anjer” na aña 2018 na Amsterdam for di Princes Beatrix, e hendenan cu a mira e obra – e profiel cu Rebecca Roos a traha di Alice – a pidi Roos pa traha un documentario mas elabora cu e profiel traha di dje. Inicialmente e produccion lo a dura seis luna, pero ora cu a cuminsa, e pandemia a start dus mester a warda e pandemia pasa pa por a sigui cu produccion di e pelicula aki. Awor ta mas o menos tres aña cu Rebecca Roos tabata bezig cu ne, pasobra e no kier a saca e film y entrevistanan cu tapaboca.
E titulo di e documentario a bini pasobra cu Alice ta asina druk cu e no tin tempo pa ta cansa. “Mi a expresa durante filmacion ‘I can’t be moe’ anto Rebecca a haya esey hopi tipico pasobra mi ta papia Papiamento cu palabra Ingles, mi tata ta papia Ingles, mi mama Papiamento y mi bisiñanan Hulandes, mi a lanta den hopi idioma y tin bes mi ta bruha nan, te awe.”
Tur hende ta felicita Alice, e ta masha agradecido pero esun cu merece tur felicitacion y honor ta Rebecca Roos pasobra el a produci un cos increiblemente bon, hopi profesional con el a edit e film. “E merece tur e pabien.”
TOCANTE E DOCUMENTARIO
Den I CAN’T BE MOE ta sigui e persona Alice Van Romondt cu den e mundo di arte na Aruba, pero tambe den henter Caribe Hulandes ta un persona hopi influencial. E mes no ta artista pero e ta inspira y encurasha hopi persona masha diverso pa sigui cu proyectonan di literatura, musica, arteplastico, teatro y kico cu ta,cu ta cay bao di arte of proyectonan social.
Originalmente e idea tawata pa sigui Alice pa 6 luna, den cua tawata tin un agenda hopi yen di evento na Aruba y den exterior. Asina lo a duna un bista completo di e “fenomeno cu ta Alice van Romondt”. Pero net prome cu lo a cuminsa filma, COVID a dal cera mundo. Asina ta cu al fin al cabo mester a haci algun cambio, y a sigui Alice pa dos aña entre 2020 y 2022.
Sin e apoyo y comprension di e co-financiadonan UNOCA y Prins Bernhard Cultuur Fonds Caribisch Gebied, y diferente sponsor y co-producer Jonathan Vieira e documentario aki no lo tawata posibel.
Aunke cu e proyecto a encontra hopi reto unico, Rebecca Roos a keda contento cu e resultado final den cua no unicamente ta haya un potret di un persona dinamico y cu ta inspira, pero via di dje y su actividadnan tambe di e industria creativo na Aruba y den Caribe Hulandes completo.
