No ta un ni dos, sino un cantidad di docente a keha na Departamento di Finansa di Gobierno, na SKOA, na DPS, na Departamento di Enseñansa y na nan sindicato, debi cu nan salario tabata menos e luna aki. Dialuna ora nan a haya nan salaris slip y ora nan salario a subi nan cuenta di banco, a nota diferencia di entre 60 florin te cu hasta 1000 florin!
A splica nos cu tabatin un eror den calculacion di e prima di trahado na e fondo di pensioen di APFA. Pa hopi e ta masha straño pasobra ta e “werkgeversbijdrage” a cambia y no e prima di cada trahado. Tambe ta parce awo cu ta docentenan so a topa cu e problema aki.
Pero no ta e asunto di pensioen so, pasobra otronan a keha di “toelage” nan cu no a paga diripiente e luna aki, mientras cu un otro grupo a keda sin cobra “overuren”. Atrobe, no a scucha critica di otro ambtenaarnan, sino den su mayoria tabata docentenan. A bisa nan cu ta e persona cu ta maneha “payroll” na Departamento di Finansa a haci un kibocacion y cu otro luna lo corigi e eror. E docentenan ta teme cu ora corigi e eror den salario di october, cu nan lo bula pa un otro escala di impuesto y cu na final lo bolbe cobra menos den nan man.
