Corte di Apelacion ayera a tuma un decision den e caso di e compania Project Management Engineering & Consultants NV (“PMEC”) contra CITGO Aruba Refining NV (“CAR”). E caso tawata trata di un claim di PMEC vs CAR di Afl. 3 miyon y pico pa servicionan brinda cu e refineria tawata nenga di paga p’e. E hustificacion cu CAR a uza pa no paga PMEC tawata, entre otro argumentonan, cu e sancionnan di Presidente Mericano contra Venezuela y PDVSA, tawata prohibi pago sin permiso di autoridadnan Mericano y cu e autoridadnan ey no a duna e permiso rekeri.
Den e decision di ayera Corte di Apelacion a bari e argumento ey di CAR for di mesa basa riba e sigiuente consideracionnan :
1. CAR no por basa su mes riba force majeure of circunstancianan cu nan no por a anticipa pasobra mayoria di e servicionan di PMEC a wordu solicita dor di CAR despues di augustus di 2017 ora cu e sancionnan Mericano a wordu institui.
2. No obstante institucion di e sancionnan Mericano na augustus 2017 CAR toch a keda haci uzo di e servicionan di PMEC, sin consulta cu PMEC riba e posibilidad cu talvez e sancionnan ey lo por a prohibi CAR pa paga pa e servicionan di PMEC. Bao di e circunstancianan ey falta di cumplimento cu e obligacionnan di CAR segun nan contract cu PMEC no por wordo hustifica.
3. E sancionnan Mericano (muy particular Executive Order 13808) no ta prohibi pago pa servicionan cu PMEC a brinda pero ta prohibi mas bien financiamento duna na Venezuela y PDVSA.
4. Ademas General License nr. 2 y 2A specificamente ta permiti transaccionnan entre PDV Holding, CITGO Holding, CITGO Petroleum (e companianan di PDVSA estableci na Merca) y nan companianan afilia, di cual CAR ta uno. Esey kier men cu no tawata tin ningun obstaculo pa financiamento di e operacionnan di CAR door di CITGO Petroleum of PDV Holding.
5. E argumento presenta pa e abogadonan Mericano di CITGO cu e General License nr 2 y 2 A no ta permiti pagonan na CAR pasobra tal pagonan lo faborece PDVSA y Venezuela no por a convence Corte di Apelacion pasobra e argumentonan ey no tawata cuadra cu e texto di e General Licenses en cuestion.
6. Ademas, Corte di Apelacion no ta kere cu e autoridanan Mericano of Corte na Merca lo impone boet of otro castigonan contra CITGO y su oficialnan si nan haci pagonan na CAR pa facilita pago pa e servicionan di PMEC manera cu e abogadonan Mericano di CITGO ta pretende.
Loading...
Reload document 
Open in new tab Conclusion
E decicion di Corte di Apelacion p’esey ta cu CAR mester paga PMEC Afl. 3 miyon y pico mas e gastonan di e caso.
Importancia di e decicion aki ta bay mas leu cu e caso di PMEC pasobra CAR y CITGO ta uza e mesun argumentonan di e sancionnan Mericano pa keda sin paga varios otro contratista y tambe pa keda sin paga RDA huur pa e refineria y sin paga Gobierno e impuesto cu nan debe segun ley.
E decicion di Corte di Apelacion ta un precedente cla y raspa cu ta mustra cu e argumentonan di CAR y CITGO cu nan no por cumpli cu nan obligacionnan financiero cu RDA, contratista y empleado, pa via di sancionnan Mericano contra PDVSA y Venezuela no tin ningun pero ningun credibilidad!
