E problema di FEFFIK ta uno cu sigur tabata tin un rabo basta largo y dudoso for di un principio, na momento cu kier a bin cu un reorganisacion di e scol y hasta bin cu trayectonan nobo pa e muchanan por haci ofishinan nobo.
Mirando cu kier a drecha e mercado laboral, “werkend leren” pa hopi aña a nombra esaki como un manera pa contribui na e enseñansa vocacional. E studiantenan, despues cu nan sigui cu conocemento basico na FEFFIK, cuater dia pa siman nan ta bay traha y un dia pa siman nan ta bin scol bek.
E studiantenan ta haya un contracto di labor como trahado-studiante y en todo caso lo bay gana un salario minimo. Docente y mentornan di e compania, ta guia e muchanan.
Bishita di minister Glenbert Croes
Den e mesun cuadro aki, durante su bishita na Corsou, minister di asuntonan social y labor, Glenbert Croes a bishita FEFFIK, pa su calidad como scol di ofishi y sigur por ta un ehempel pa esun cu nos mes tin na Aruba cual ta Scol Practico pa Ofishi.
Gobierno kier cera FEFFIK
Sinembargo, apesar di tur cos, propaganda, etc. minister Marilyn Alcala-Walle, kende ta encarga cu enseñansa, ciencia, cultura y deporte, a indica cu lo cera e scol, aunke cu e lo keda existi ainda pa aña escolar 2018/2019. Segun e mandatario, ta conoci cu e scol tin problemanan financiero y esaki ta haci imposibel su existencia. Mientras tanto e subsidio pa e instituto ta baha gradualmente.
Demostracion
Awe finalmente, docente y demas trahadonan di FEFFIK lo subi caya. E instituto lo bay cera na Augustus, pero e personal ta pensa cu nan no lo haya un trabao adecuado.
Ta trata aki di 24 miembro di personal, cu ta miembro di e sindicato di maestro Sitek. Y pa motibo di henter e situacion na e instituto, a dicidi pa pone tur cos abao y drenta den accion.
Miembronan di Sitek no tin ningun confiansa cu e minister di Desaroyo Social, Labor y bienestar Hensley Koeiman, lo para pa nan.
Tambe minister di enseñansa Alcala-Walle, a reacciona dialuna anochi sorprendi ora cu el a tende cu e miembronan di sindicato ta cla pa demostra. Miembronan di sindicato a pone nan punto bon cla. Nan ta dicidi loke nan kier, ta bay riba nan bida, nan trabao y nan alumnonan. Si nan ta sindi cu FEFFIK mester keda habri, ta nan derecho y nan ta protesta si nan kier tambe. Esey ta loke lider sindical Darius Plantijn a splica.
E realidad ta asina, Gobierno di Corsou kier cera FEFFIK. Docente y studiantenan no kier. Miembronan di Sitek ta preocupa riba nan futuro y esun di nan studiantenan. “Ki chens nan tin? Ningun hende no a bisa nan nada ni a sigura nan cu nan futuro no lo bay tin’e mas miho. Al contrario. Nos ta mira cu tur chens ta wordo kita door di cera FEFFIK.”
