Con cu bay bin, den tur cos cu ta envolvi RDA, WEB Aruba NV, companianan di Gobierno, Utilities tin un rol pa hunga tambe den hopi di nan cu ta crucial pa nos pais. Director di Utilities, Franklin Hoevertsz tabata na Miami, unda cu el a firma parti di loke lo bay bira un proyecto cu lo bay concretisa den un proyecto hopi grandi pa Aruba, hunto cu Citgo.
El a comenta cu esaki ta un MOU cu a wordo firma, cu ta e prome paso pa un proyecto hopi grandi y hopi importante pa Aruba. Tradicionalmente e refineria tabata produci su mesun coriente y no tabata depende di WEB pa suministro. Loke a negosha cu Citgo ta cu nan lo bay traha un business case pa WEB bay duna un generacion dedica na Citgo Aruba Refinery. Refineria no ta bay genera su mesun coriente mas, pero WEB ta bay trah’e p’e. Loke ta esun di mas logico pasobra WEB pa 85 aña t’esey ta su core business y semper tabata tiki straño cu nunca a bin riba e idea of nunca a haci’e of di tur dos partido e no a bin. Esaki ta un paso hopi grandi pa WEB, pa e genera y ta parti di e progreso di un refineria cu ta wordo habri atrobe.
Situacion a cambia
E situacion ta bay cambia full pasobra ta bay tin un planta dedica puro pa e refineria, caminda cu WEB lo ta e doño y lo bay bend’e cu e refineria. E refineria no mester worry cu coriente ni awa. WEB ta bay produci pa tur dos servicio pa refineria.
Rol crucial
Esaki ta pasonan positivo pa e desaroyo. Segun Hoevertsz, e tabata yuda unda cu e por, pero refineria tin dos parti innovador, fuera cu e ta bay habri un biaha mas, ta esun cu mester bay draai riba gas, cual ta hopi mas limpi. Di dos ta bay uza test di bio algae pa bin cu un reactor di algae na Aruba. Esaki tambe ta un otro innovacion den sentido cu nunca refineria a cumpra casi nada for di WEB na coriente y poco na awa. Akinan ta haya un principio di un economia circular cu na Aruba mes e coriente ta wordo traha y e awa ta wordo traha pa e refineria, segun Hoevertsz.
