Por a tuma nota cu FFD (Fundacion Facilidadnan Deportivo) tabata tin un reunion. Trahadonan ta preocupa. Junior Tromp, kende ta director na FFD, a splica e reunion tabata mas tanto cu personal cu ta afilia na SEPPA. E punto ta cu a palabra cu lo bay cuminsa delibera riba un CAO. Ora cu ta papia di deliberacion ta papia di busca manera pa yega mas lihe cu ta posibel na otro. Esey ta e punto di salida, segun Tromp.
Un di e puntonan mas importante den esaki tabata cu ta cuminsa na comienso di April, unda cu tin un streefdatum, pa 1 di Juli, 2018, cu ta asina leu pa firma un CAO cu sindicato SEPPA.
A tene reunion y nan ta bayendo bon, Tromp ta comenta. Sinembargo, ora cu yega na firma e relatonan, eynan cos ta pega y una bes cos pega, ta haya problema. Bo no sa kico a wordo palabra of si algo a wordo palabra, überhout cu ta yegando cerca di otro. Aki nada no a wordo firma. Dado momento, a manda SEPPA un carta y pidi pa duna comentario riba cualkier cos, skirbi’e y agreg’e riba e notulanan entrega, pasobra ta personal di FFD a traha relato di e reunion.
A pidi SEPPA pa bin cu nan pensamento, bin cun’e y si no ta hay’e bon, agrega di nan e ora lo acorda esaki den e reunion. Pero nan a bisa cu a comenta esaki caba. A tene dos reunion mas y riba e di tres reunion, no a dura hopi. Na e momento ey, SEPPA a bandona e luga y ta pa e motibo ey, a base di un reunion cu tabata tin, hunto cu directiva di FFD, cual a avisa pa yama tur personal afilia na SEPPA, informa nan kico a pasa. Esey a tuma luga. A informa nan precies kico a pasa, henter e trayecto cu a encamina y full un trayecto anterior cu a encamina, unda cu a palabra aña pasa cu lo bay forma un Petit Comite, unda cu tin abogado di parti di SEPPA, abogado di parti di FFD y cu nan ta traha riba un resolucion entre SEPPA, hunto cu FFD. Esey a tuma luga. Te hasta esey a wordo poni un banda. Cosnan asina ta trece cu no tin e siguridad, cu ora yega na algo, e ta un done deal, cu cada biaha tin cu keda bin riba e puntonan anterior pa soluciona nan.
Esey tabata algo cu a pasa masha hopi biaha. Pa evita un problema, a dicidi pa avisa tur esnan cu ta afilia na SEPPA di parti di FFD, informa nan bon kico a pasa. A informa nan tambe di e conseho cu tabata tin di e parti di e Petit Comite, forma pa abogado di parti di SEPPA y di FFD, cu SEPPA mes a pidi pa FFD puntra directiva kico nan ta pensa. Directiva a keda para riba su punto di loke a keda palabra y ta biba cun’e. Pero SEPPA no por biba cun’e, segun Tromp. SEPPA tabata tin su representante den e Petit Comite. No a yega na un consenso y riba dado momento tabata tin un walkout. Pesey a yama e reunion pa informa e personal cu ta afilia na SEPPA, pa informa nan con tur cos a bay, con e desaroyo a bay, for di comienso te awor aki.
