Na Arubus tin hopi incertidumbre, segun presidente di STA, Diego de Cuba. E sindicato tin representacion den e compania, pero ultimamente trahadonan a rabia cu STA. Ta sinti cu e sindicato ta gañanan cu e situacion di Arubus ta grave, pero esey ta un hecho.
Mayoria di e trahadonan a bay cu SEPPA y hasta nan a pidi un referendum. Pero esey ta nan derecho. Hecho ta keda cu tin diferente compania subsidia. Segun de Cuba nan ta haya un landsbijdrage di Gobierno pa nan sobreviviencia y Arubus ta un di nan. Arubus su entradanan den 2020 a cay cu 52%.
Nan tabata den un situacion dificil caba y cu e caida di 52% ey, nan situacion a bira pio.STA kier a evita cu nan ta bay reorganisa y manda hende cas. Pa duna un ehempel, AAA mes, cu ta un compania multimiyonario, a bay over na reorganisa. A duna e hendenan un bon pakete y nan a sigui cu e reorganisacion. Aki 47 hende a tuma pakete, e 11nan cu falta cu no kier a tuma pakete a pidi ontbinding den corte.
STA kier evita esey den Arubus. Arubus no tin un buffer. Segun e sindicalista, na otro companianan Estatal tambe tin situacion ta penoso. Hopi biaha ta pone reunion y e miembronan no ta bin. Cua sindicato e trahadonan bay, nan no ta scapa di e situacion, pasobra e t’ey. Por bringa pa e trahadonan cu alma y curpa, loke cu semper STA a haci, trece beneficio extra aden, pero e hecho ta keda cu e compania ta sangrando.
STA tabata tin miedo pa nan bay over na un reorganisacion y e ora ey hopi mama cu tata di famia lo a perde nan trabao. Pero manera cu por a mira, e rumbo cu e ta bay, no ta descarta cu esey lo por sosode den Arubus tambe, pa asina scapa e compania. A menos cu nan dicidi cu nan ta bay coopera cu gerencia, e sindicalista a enfatisa.
