Diadomingo anochi tin eleccion di Prins y Pancho riba Plaza Betico Croes

7 January, 2023, 1:30 pm

Diabierna anochi e participantenan pa cu eleccion di Prins y Pancho a reuni cu e directiva di SMAC na e oficina di e organisacion aki na Plaza Betico Croes.

Sharisa Kamperveen, vocero di SMAC, a duna di conoce e eleccion di e personahenan aki carnavalesco lo tuma luga e weekend aki caba, esta diadomingo.

E evento lo tuma luga na Plaza Betico Croes mes y diabierna a tira lot den e diferente categorianan. Den cada categoria tin dos pareha participante. Lo tin cuatro categoria: infantil, hubenil, grandi y adulto. E ultimo aki ta un categoria nobo den cual tambe tin dos participante. Pues en total 8 duo participante.

E participantenan den e chikitonan ta: Aiden Harms y Dyshel Roga, (Prins Bon y Pancho Mucha), nan ta representa Champagne Carnival Group; Derwin Aaron (Prins Paki) y Zayron Rafine (Pancho P’aya). Nan ta representa Empire Carnival Group y Rockets. Den categoria hubenil tin: Obi Tromp (Prins Djis) y Zenon Daal (Pasa) y ta representa Champagne Carnival Group; Lucas Geerman (Prins Wiskunde) y Shaquion van der Biezen (Pancho Algebra). Den categoria grandi ta cuminsa: Shaquille Buckley (Prins Bin) y Justin Valdez (Pancho Aden). E di dos duo participante ta Endrick Panneflek (Prins Bon) y Ivan Werleman (Pancho Fresco), representando Infinity Carnival Group. Den e categoria nobo (Adulto) tin Eduardo Loefstop (Prins Bula) y Alberto Groeneveld (Pancho Fuse) y Igmar Tyson Croes (Prins de show) y Randolph Ras (Pancho Mas go on), representando Champagne Carnival Group.

E prome evento di SMAC riba programa ta Parada di Flambeu y eleccion di Prins y Pancho e di dos, cu ta cuminsa diadomingo anochi 7’or riba Plaza Betico Croes. E ta completamente gratis e evento pa cual ta invita publico pa acudi masalmente.