Pa evita cu nan mester papia y menciona e motibonan dicon nan tin desconfiansa den dje, e tres fraccionnan di MEP, POR y RED a pidi Presidente di Parlamento un reunion urgente pa termina confiansa den Minister Marisol Lopez-Tromp. Di e forma aki, no ta move su carteranan sino ta kit’e for di trabou. Esaki ta bira prome biaha den historia cu Parlamento ta kite un minister den funcion for di trabou, por medio di un mocion di desconfiansa. E fraccionnan ta planea pa haci esaki den forma di “hammerstuk” pues sin cu mester vota y sin cu mester hustifica nan decision.
Den un carta manda pa Parlamento di Aruba diadomingo ultimo, dia 26 di juli, precisamente dia cu Minister Marisol Lopez a sali pa Hulanda cu vakantie, e Lidernan di fraccion di e partidonan cu ta sostene Gobierno, a manda pidi un reunion urgente. E peticion ta a base di e impase cu a presenta den e partido politico POR. Segun e firmantenan, e impasse den POR a continua hasta despues cu a sigui e procedura di mediacion, via di Raymond Maduro. Aunke cu ta un solo reunion di mediacion a tuma luga. Den dicho reunion e lider nobo a insisti pa Lopez-Tromp sigui tur “ordo” y “instruccion” cu ta bin di Otmar Oduber, relaciona cu terenonan of otro trabounan den Gobierno. Ora el a purba splica cu tin asuntonan contra ley y coruptivo tumando luga, a rabia y no a sigui reuni.
Loading…
Reload document 
Open in new tab Di otro banda, den e carta na Parlamento, e parlamentarionan ta tene na consideracion cu lider di POR, mr. Andin Bikker, a informa Conseho di Minister recientemente cu e no lo atende ningun reunion mas tanten cu Marisol Lopez-Tromp ta sinta eyden. Esey a haci cu e relacion di trabou a bira imposibel. Cu esey den mente a pidi pa un reunion urgente pa por baha e Minister aki mesora pa asina gobernacion por continua.
Loading…
Mester menciona cu di otro banda, cu e mesun dia cu e carta a yega Parlamento, esta dialuna mainta dia 27 di juli, e mesun dia Secretario di Conseho di Minister, Grace Koolman, a manda informa Parlamento cu Minister Marisol Lopez-Tromp ta cu vakantie na Hulanda for di diadomingo dia 26 di juli te cu dia 10 di augustus pa motibo priva. E mandatario a informa den fin di siman cu e ta bayendo pa hiba su yiu muhe mayo sigui studia na Madre Patria.
Si Parlamento haya otro y sostene e peticion di e tres Fraccionnan, anto e ora Marisol Lopez-Tromp lo a biaha bay Hulanda como Minister y lo regresa nos isla dia 10 di augustus proximo sin funcion y sin trabou. No ta conoci si ainda a warda su trabou pe den Gobierno den Departamento di Asuntonan Social, cu el a bay laga desde 1997 ora el a drenta politica na Aruba.
