Awe mundo completo a para keto pa observa Dia Mundial di Turismo. E aña ‘ki e tema ta “Rethinking Tourism”. Mainta a duna inicio n’e celebracion aki di un manera diferente. Durante un ceremonia a dedica e dia aki na dos pionero den turismo: Juan Enrique Irausquin y Ike Cohen.
Durante e ceremonia aki, CEO di Aruba Tourism Authority, Ronella Croes, a menciona diesseis nomber di personanan cu a fungi como pilar pa nos turismo. Entre e icononan aki ta Wichi de Palm, Luis Plaves, Herman Ponson y Eduardo de Veer. Croes a menciona cu nan tabata icono pa nos turismo cu a duna hopi di nan mes. “Y ta precisamente pa e motibo aki nos ta para aki tambe. Pa honra un di e icononan mas importante den nos turismo, Juancho Irausquin”, asina Ronella Croes, CEO di Aruba Tourism Authority a cuminsa su discurso na ocasion di celebracion di Dia Mundial di Turismo.
Gobierno di Aruba a organisa un evento special na e estatua di defunto Juancho Irausquin, dilanti Postkantoor na Playa. Di e forma aki a pone luz riba un di e personahe visionario cu a para na cuna di nos crecemento turistico.
“Un persona cu su vision, pa traha un hotel grandi pa Aruba, ora cu turismo ainda no tabata mucho conoci y ningun hende tabata dispuesto pa core e risico ey. El a visualisa locual nos ta biba awe, pero esaki el a haci mas di 60 aña pasa”, di acuerdo cu Ronella Croes.
Aruba Tourism Authority ta orguyoso cu for di aña 2016 caba a traha Monumento Ike Cohen riba Plaza Turismo na Linear Park, honrando e icono aki tambe. Ey tin diesseis nomber graba riba un plachi. Un monumento pa cual ta evaluando posibel adicion di otro icononan di Aruba su turismo.
Di su banda, Minister di Turismo Dangui Oduber, den su discurso a menciona cu turismo a sufri hopi durante aña 2020 y 2021 pa motibo di e pandemia. El a continua bisando cu nos a haya un setback caminda nos a bay di casi dos shen mil turista di stay-over cu turismo crucero pa cero turista na momento cu nos a cera frontera den luna di maart di aña 2020. Di otro banda, Aruba ta bounce-back duro y pa algun luna hasta a surpasa e cantidad di turista cu nos a haya na 2019, nos aña record.
Prome Minister mr. Evelyn Wever-Croes den su discurso, a conta e storia di ambos persona enfatisando e esfuerso cu cada un a haci pa nos industria turistico.
E industria turistico di Aruba a inicia cu vision di un lider cu a mira mas leu den temponan dificil despues di guera. El a pensa cu kisas un dia e refineria lo no t’ey mas y cu Aruba lo mester ta prepara. Nomber di e persona aki ta Juan Enrique Irausquin. Despues di a traha como bankero pa hopi aña, Yrausquin a drenta den politica y na 1949 el a lanta su propio partido politico PPA. For di 1955 pa 1975, Juancho Yrausquin y su partido a goberna Aruba cu un mayoria absoluto na varios ocasion.
Hunto cu su man drechi den gobernacion, Oscar Henriquez, Yrausquin a convence e empresarionan pa kere den Aruba y den nan plan. Despues di establece e planta di awa y coriente pa Aruba, a expande Aeropuerto cu un pista nobo, a traha boulevard y a traha cu e miho arkitectonan di Merca, pa diseña Aruba su prome hotel grandi, Aruba Caribbean Hotel.
E hotel aki a bira e carchi di invitacion internacional di Aruba, pa invita turistanan for di Merca, Europa y henter mundo pa pasa nan vacacion riba nos isla.
Dia Mundial di Turismo 2022 ta conmemora cu 60 aña pasa (20-06-1962) Juan Enrique Irausquin a fayece.
Ademas a conmemora cu 15 aña pasa e exitoso empresario/hotelero masha stima, Ike Cohen a bay laga nos. Despues di a perde su mayornan y ruman den segunda guera mundial, Ike Cohen kier a cuminsa un bida nobo den un pais leu di Europa y leu di e situacionnan cu tabatin den guera. Hulanda e tempo ey a ofrece apoyo financiero pa esnan cu lo kier a bay biba y inverti den e colonianan di Reino. Ike Cohen a bay Corsou, despues Surnam y despues finalmente el a scoge pa forma su bida na Aruba.
Si no tabata pa e pioneronan aki, cu tabata visionarionan grandi, cu tabata dispuesto pa core risico financiero-economico, cu awe nos lo no tin e desaroyo turistico cu a bira nos unico pilar economico.
