Melony Croes-Paesch, di Champagne Carnival Group, a expresa solamente alegria y gradicimento pa un di tres Caya Paden cu tabata exitoso. “Semper nos tabatin apoyo di tur hende pa evento di Champagne Carnival Group,” el a bisa memey di un Renaissance Convention Center completamente yen.
Y na final di anochi ya caba a cuminsa pensa riba e di cuater edicion. Solamente ta spera e schedule di SMAC pa 2025 y pa pone e fecha di e siguiente Caya Paden.
E tabata un anochi yena di ambiente, unda cu esunnan cu a acudi tabata practicamente henter anochi bailando.
Un di e bandanan participante den e evento di Caya Paden ta e popular banda Buleria. “E anochi ta cayente, yena di ambiente,” ta loke cu e cantante Jair (Buddy) Vesprey, a expresa. Na mesun momento a conta cu e preparacion pa final di Caiso & Soca Monarch ta den full swing. “Mientras pueblo ta celebra Dia di Betico, nos musiconan ta prepara pa duna un bon show den e final di Caiso y Soca.”
E sala di Renaissance Convention Center diaranson anochi tabata completamente yen, sigur mas cu mil persona eyden pa disfruta di celebracion di Aruba su carnval 70, cu hustamente den e hubileo aki ta un temporada hopi cortico.
Maicky Oliva (Campo) tabata sinti’e den un ambiente total. “Masha dushi ambiente,” e cantante di e banda Duro a comenta.
Den e eventonan aki tabatin bandanan grandi y popular di Aruba manera Tsunami, Buleria, Ataniro y DJ SKY. Ta un evento unda cu e grupo di carnaval ta recauda fondo pa nan participacion den Aruba su carnaval y yuda engrandece e celebracion aki.
Loke ta haci e anochi aki un exito sigur ta e participantenan, no solamente esunnan cu ta Champagne Carnival Group, pero e participante en general. Un di e participantenan den e ambiente aki ta Lizzy Arends, kende tabata bula riba cada cantica di carnaval cu a presenta e anochi’ki. “Un bon iniciativa di e organisado, pa bini un evento up-scale asina cu nos por disfruta di dje.”
Por a nota den e multitud tambe e personalidad di mundo artistico Tyson Croes (Rey di Tumba loco). “E ta un sentimento dushi, mas despues di a gana e titulo di Rey di Tumba Loco. Mi ta contento di a aporta y ta sigui aporta na Aruba su carnaval.”
Croes tabata maestro di ceremonia den e prome dos edicionnan y aña’ki el a haya compania di Tarrick Ras, personalidad conoci den radiodifusion. “Mi ta famia caba di Caya Paden, mi gusta e hendenan y e ambiente.”
Papia di Champagne Carnival Group ta sinonimo di e nomber Linchie Merryweather. E ta lider di e grupo y un parti principal di e motor cu ta pusha e grupo. “Mi ta contento di mira asina hopi hende gosando.” Linchie casi no tabatin stem pa expresa su mes. Pero loke si e por a expresa ta cu e no ta arepenti cu na momento cu a propone na dje e prome biaha pa organisa un fiesta carnavalesco. “Ami nunca a organisa fiesta. Wak kico el a para bira awo. Un fiesta riba schedule di carnaval y cu lo bay hopi mas aña.”
Awo e organisadonan di biaha ta cuminsa cu preparacion pa e siguiente edicion di Caya Paden.
