Cu e sentencia di diahuebs cu Corte a impone contra un homber acusa di a tene relacion sexual cu un menor di edad, por a nota cu ainda no tin un cambio den loke ta keda imponi. E homber Paul Merveille di menos cu 30 aña a haya un castigo di 15 luna pa tene relacion sexual cu un mucha di 13 aña.
Dia 25 di juni, net prome cu e manifestacion grandi di 3 di juli “End ChildAbuse” y esun di Richie Danies, Parlamento a bay di acuerdo den forma unanime pa aumenta castigo pa casonan di inmoralidad (Zedenzak). Pues no solamente pa mishi of tene relacion cu mucha, pero tambe casonan manera violacion sexual.
E cambio di ley aki a keda publica dia 2 di juli den Afkondigingsblad Aruba dia 2 di juli y a drenta na vigor di e forma aki. Sinembargo si mira e castigo impone diahuebs, anto por conclui cu ainda Minister di Husticia no a sinta cu Corte na Aruba y tampoco Hof a sinta cu su Huesnan pa yega na un “indicatiepunten” nobo pa loke ta altura di e castigonan den zedenzaken (casonan di inmoralidad.
Entre luna di juni y juli Corte a trata en total 7 caso di inmoralidad di cual un acusado a wordo declara liber y seis otro a haya condena, inclusive e sentencia cu a cay ayera diahuebs.
CASO
Paul Arthur Merveille a haya un castigo similar na un otro caso cu a tuma luga den luna di juni, pa un persona cu e mishi cu dos mucha, aunke den e caso aki tabata relacion sexual.
E prome acusacion cu ta bisa cu Merveille a abusa di e mucha muhe di 13 aña dia 24 di april, 2019, no a keda proba. A declar’e liber di e acusacion aki.
Pero si a hay’e culpabel di a tene relacion sexual cu un mucha muhe di 13 aña. Esaki tabata basa riba e hecho cu e mucha muhe mes a admiti cu e tabatin relacion intimo cu e homber. Pero un amigo di e acusado tambe a conta Polisnan tur loke el a tende di Merveille mes di kico a pasa, cu e mucha muhe a cuminsa sunchi y mishi cu ne. E testigo a zundra su amigo pasobra e ta haya cu e mucha por ta su yiu y e mester a par’e mesora. Y tin hende cu a mira e acusado y e mucha muhe hunto dia cu e hecho a tuma luga.
Dokter a haci un examen riba e menor y a bisa cu e menor si tabatin relacion sexual pero no tabatin indicacion di violencia. Corte a menciona den e sentencia e aspecto cu ta trata aki di un adulto cu un menor, kende ultimo aki kier a experencia. Pero cu e adulto mester a para e situacion.
Pa motibonan ariba menciona, a condena Merveille na 15 luna di prizon, kitando e tempo cu el a sinta caba.
Historia
E ultimo dos lunanan tabatin diferente caso presente den Corte cu ta cay bou di “zedenzaak”. Recientemente tabatin sentencia den e caso di Edixon Arguelles pa tene relacion cu su yiu menor di edad y condena na 6 aña di prison; Jaime Trimon condena na 5 aña pa mishi cu dos menor di edad cu e tabata yuda nan cu huiswerk; Marvin Stennett, condena na 6 aña pa abusa di e amiga di su yiu homber; mishi cu su yiu menor y laga su dos yiu hombernan tene relacion sexual cu su casa inconsciente, y posesion di material pornografico di su yiu menor di edad. Tulio Wever, condena pa mishi cu su dos sobrinanan. El a haya un condena di 30 luna di cual 10 luna ta condicional y 3 aña di prueba. Tabatin esun di e hoben di 17 aña Matheo, kende a abusa di un muhe di 35 aña, relacion contra su boluntad. A hay’e culpabel pero door di su edad el a haya un condena di 2 aña di tratamento obligatorio den un instituto psikiatrico.
