Desde 8:30am te cu 12:00pm, Hues lo scucha un total di 23 sospechoso, cu a detene durante e periodo di Toque de Queda. Esaki ta e prome parti di un grupo mas grandi di sospechosonan cu sea no por a paga e multa den 2 siman di tempo of cu no ta di acuerdo cu nan detencion. Cada un tin 10 minuut pa “defende” nan caso dor di expresa nan motibo dicon no ta di acuerdo cu nan detencion.
Gobierno a aplica e medida di Toque de Queda na Aruba despues di mas o menos 43 aña. Na tur e Toque de Queda a keda na vigor durante 67 dia y a detene 683 sospechoso. E prome dia tabata 21 di maart y e ultimo dia tabata 27 di mei.
E multa a cuminsa na Afl. 1.000,= y por a subi mas tambe, dependiendo cuanto biaha a detene Bo y si Bo resisti of comete otro infraccion banda di e hecho di ta riba caya despues di e orario stipula. No ta tur persona deteni a haya multa ni a keda encarcela. Pues Sub Fiscal a laga algun persona bay mesora, mientras otronan si no a core e mesun suerte y a haya nan den un debe inespera. Ta e grupo aki awo ta bringando e decision di Polis y Fiscal dilanti un Hues imparcial.
Awe lo haya un bista di kico Corte mes ta pensa riba henter e temporada aki y e forma con husticia a uza un procedura penal pa maneha un situacion di salud publico. Den algun pais na Europa ya caba Corte a desbarata tur e detencionnan aki y declara nan ilegal. Di otro banda, Gobierno a hay’e cu un virus cu a bin cu opcion di contagio sin prescedente, pa cual a opta pa siguridad di nos pais y di nos ciudadanonan, pa implementa e medida mas estricto pa tin control den ora di anochi.
Por corda cu Orden di Abogadonan a protesta contra e medida. A acusa Gobierno di a uza un procedimiento mucho pisa pa regla un reto di salud, sin cu nunca por a prueba cu anochi e virus tin mas chens di contagia otro cu den dia. A condena e hecho cu Gobierno mes a menciona cu criminalidad a baha durante e periodo, demostrando claramente cu e motibo tras di ehecucion di e ley no tabata pa Covid-19, sino mas bien pa frena aumento di criminalidad den nos pais.
