Diamars anochi recherche a detene e señora di inicial E.I.B. di 66 aña. E señora ta sospecha di a yama na Canal 90 durante programa Pueblo na Palabra y menasa cu morto e actual Minister President. E yamada a sosode riba 13 di Juni 2018 atardi y a pone Gobierno manda e programa di yamada di pueblo pa duna nan comentario keda sin bai den aire pa dos dia largo.
Den comunicado di prensa algun dia despues di e incidente Gobierno a remarca cu “Un señora a yama y a expresa cosnan hopi mahos cu no solamente ta afecta e orden publico y Gobierno sino pio ainda e señora aki a expresa palabranan di menasa di morto na Prome Minister bisando cu e lo “pasa un bala den su celebro”. Esaki pa e Premier di Aruba ta e prome biaha cu el a ricibi un menasa di e indole aki y por lo tanto el a entrega keho contra e señora aki.
