Diadomingo, pa mas of menos 4’or y 35 di marduga, varios unidad di Noord a wordo dirigi dilanti di Lekker Bar & Restaurant na Noord, unda cu lo mester a sosode un accidente. Na yegada di e patruyanan, a bin topa cu un Kia Rio color bruin, A-50092 y un Toyota Tercel color blanco, numera A-25701. E dama den e Kia Rio ta conta polis cu e tabata bezig ta reverse pa subi caminda y na dado momento e Tercel a bin di p’ariba y dal riba e Kia Rio. Polis a bay over na pone tur dos manehador supla pa wak su nan lo ta bou influencia di alcohol. Ora e manehador di e Tercel a bay supla el a bira un poco fresco. Despues cu el a caba di supla, e chauffeur aki a keda deteni, debi cu el a surpasa e limite di alcohol permiti. Despues a toca turno na e dama, kende tambe a keda deteni pa e mesun motibo. Transportwagen a wordo pidi pa asina transporta e detenidonan pa warda di Shaba. Daño material tabata bastante. Azeta a keda plama riba caminda y a manda pidi DOW pa presenta y basha santo riba caminda, pa asina evita cu mas desgracia por sosode. E autonan a wordo getake for di e sitio.
