Despues cu a tende cu Aruba Arlines a keda cla cu inspeccion di servicio na Merca, un piloto a bin cu cierto señalnan di Covid. Awor aki mes e piloto no ta trahando. E ta den Quarentena pendiente desaroyo pa cu su salud. Aruba Airlines mientrastanto a tuma pasonanan necesario pa asina garantiza cu su avionnan ta liber di cualkier situacion di Coronavirus.
E avion cu recien a yega Aruba ya caba a cuminsa haci su vuelonan entre Aruba cu Curacao y Bonaire. Gerencia di Aruba Airlines prome cu e salida di e avion, a actua tambe pa garantiza cu tur cos ta na ordo pa evita cu cualkier pasahero por drenta preocupa den e avion. A zorg pa desinfecta e avion completamente y despues di cada vuelo ta bolbe desinfecta e avion.
Kier garantiza cu cualkier pasahero cu aborda, no bira victima di otro pasahero cu kizas sin cu nan sa ta infecta cu e virus. Ora cu un pasahero aborda e avion di Aruba Airlines, e por ta sigur cu e avion a wordo desinfecta prome cu e subi. Den e caso di e co-piloto cu awe tin sospecho di Covid, a haci mas bien un cambio di pocision di Jacksonville pa Aruba.
Despues di e tipo di e vuelonan aki e pilotonan ta pasa un prueba di e virus tambe. Asina ta evita of preveni cu e crew ta duna servicio infecta cu e virus. Ora cu e crew subi avion bek, nan mester ta liber di Coronavirus. Henter e crew a test negativo entrenan e capitan. Solamente e co-piloto ta esun cu a haya su mes den problema. E mes no ta sinti ningun sintoma di Coronavirus.
Ta a base di e test a ripara señalnan di Corona. Pa evita cu e por pega cualkier colega of otro persona na Aruba, a pone e co-piloto y e capitan mesora den Quarentena. Mientrastanto e avionnan ta dunando servicio y e comunidad entre e islanan ABC por ta sigur cu ora nan aborda e avion di Aruba Airlines, nan ta den un avion totalmente desinfecta y Covid Free.
Esey ta conta tambe pa e oficinanan di Aruba Airlines cu a pasa den mesun proceso di desinfecta. Desde cu e avion a cuminsa cu su vuelonan, e ocupacion entre e islanan ABC ta sumamente positivo.
