Ministerio Publico pocopoco ta cerando e circulo rond di ex-minister Chris Romero y ex-minister Eddie Briesen, envolvi den e caso Kwihi. Aunke a keda keto pa basta tempo, awe mainta a detene e coordinador Eumar Koolman, cu tabata un man drechi di ex-Minister Chris Romero. Ta sospech’e di a cera varios acuerdo di servicio (dienstverleningsovereenkomsten) den e periodo 2017-2021 y ricibi placa di Pais Aruba den forma fraudulento via e construccion aki.
Sinembargo, mas o menos dos ora despues, Landsrecherche a opta pa laga Koolman bek den libertad. Kico ta e motibo cu a detene awe mainta y bira lag’e den libertad un rato despues, no ta conoci. Conocedonan di e materia ta sospecha cu e lo a “basha bou” tur locual e recherchenan kier a tende y no tabatin necesidad di want’e mas aden. Locual tambe sa sosode, ora di invalnan asina, ta cu mientras nan ta papiando cu bo, ta core instala camara di grabacion y sistema di scucha combersacion den cas y auto, pa asina por prepara e caso miho ainda. Esaki a sosode sigur den e caso Ibis, di ex-Minister Paul Croes.
D otro banda, Ministerio Publico asina ta aporta na causa daño grandi na imagen di ciudadanonan. Pasobra, si ta pa lag’e bay dos ora despues, anto por a invit’e bin warda pa papia cu ne of busc’e y hib’e bek, sin cu mester a emiti un comunicado pa mancha su nomber, pa lag’e bay cas bek manera nad’un pasa. Ta un forma cuestionabel di atende cu posibel sospechosonan, den casonan di corupcion den gobierno.
Caso Kwihi ta por lo menos un di e casonan di corupcion den Gabinete Wever-Croes, pasobra separa cu e locual cu tabata sosode den e Ministerio di Transporte, Communicacion y Sector Primario, tambe ta conoci cu e mesun Gabinete aki a entrega keho penal contra nan ex-colega Guilfred Besaril, sospeche tambe di fraude y corupcion na Arubahuis, na Hulanda. Ta den dos ministerio, den e ochonan cu ta existi, cu tin investigacion penal andando pa falta di integridad.
Landsrecherche ta ocupa
Landsrecherche di Aruba ta traha independientemente y bao autoridad di Procurador-General, ta investiga desde aña 1993, tur comportacion posiblemente castigabel di ambtenaar y semi-ambtenaarnan. Un parti importante di e tarea aki ta pa bringa corupcion. Corupcion ta ataca un pilar importante di democracia, esta e confianza den gobierno. Ciudadanonan mester por confia cu ta trata cuidadosamente cu placa publico. Un ciudadano mester sa cu ley ta conta pa un y tur y cu corupcion ta inaceptabel.
Investigacion “Kwihi”
Mucho informacion ainda no tin riba e investigacion mes, pero tur cos lo ta draai rond di Dienst Verlening Overeenkomst (DVO) cu Minister Chris Romero a firma pa su mes, pa su conseheronan y nan famia. Claro, na momento cu Ursell Arends a asumi e funcion di minister y a tuma e ministerio over for di Chris Romero, el a bin topa cu poco sorpresa desagradabel.
Como Minister di Integridad, el a scoge pa haci lo corecto, esta di entrega un keho oficial na Ministerio Publico. Ta menciona cu e contractnan aki, por lo menos algun di nan, ta firma na LVV Santa Rosa, pues no ta algo cu e mandatario lo topa cu ne mesora.
