Entrante dialuna, dia 8 di juni 2020, Departamento di Impuesto ta introduci un otro number di telefon pa asina su contribuyentenan por tin mas posibilidad pa comunica cu e departamento. E number di contacto nobo ta 522 7424. E number aki lo ta den funcion hunto cu e number central 522 7423.
Departamento di Impuesto ta un organisacion grandi y tin hopi persona ta yama diariamente pa un servicio y no tur ora por drenta den contacto mesora cu e departamento. Pesey e number nobo 522 7424 ta wordo introduci y lo wordo atendi pa un team dinamico di mas of menos 11 persona cu lo ta cla pa duna guia y ayudo basico riba tereno fiscal.
Servicio na cliente ta via telefon y segun orario fiho Alabes Departamento di Impuesto ta anuncia cu e seccion “Servicio na cliente” cu antes tawata atende cliente personalmente na Camacuri, awor ta dunando servicio via e number di contacto nobo. E orario di servicio na telefon ta fiho: 7:45 – 11:30 y 1:15 – 3:30. Esaki ta e mesun orario cu lo mantene pa atende tur otro yamada cu ta drenta diariamente.
Cu e contribuyente den mente, Departamento di Impuesto ta sigui introduci e cambionan necesario pa asina por brinda un miho servicio.
