Diasabra, Departamento di Impuesto ta habri. Diabierna ta Dia di Betico y nan ta cera. Pero diasabra, dia 26 di Januari nan ta pone su personal pa duna servicio.
Vocero di DIMP, Meverly Romano, a splica cu awe, diahuebs, nan ta habri te cu 8’or di anochi. Esey ta e orario te ora cu ta yuda hende.
El a comenta cu diaranson anochi tabata tin asina hopi hende cu nan mester stop di tuma hende mey ora prome. Ta recomenda tur hende cu kier bin anochi, pa nan bin prome cu 7’or, pa asina evalua e drukte mas miho.
A ripara cu entre 1’or y 5’or, ta mas trankilo. Despues di 5’or di atardi, e ta cuminsa bira mas druk. Esaki ta contrario na cuminsamento.
Na cuminsamento atardi tabata super slow. Pero awor aki e publico a dicidi cu nan ta bin atardi, pero toch ta keda cu parti mainta, Departamento di Impuesto ta habri cu basta cliente.
Ora cu no ta druk ta yuda e hendenan di 60+, hunto cu e masa. A cambia e sistema un rato pa controla e seguro pafo mes, ya ora cu ora nan pasa paden, ya e plachi ta cla caba. E ta haci e proceso asina bay mas lihe.
Un bottleneck cu tin ta esnan cu ta paga online. Berdad cu tin hopi persona cu a keha riba esey. E tin diferente factor cu a hunga un rol.
Uno ta, cu nan ta hayando hopi cliente cu ta paga pa e gastonan di sticker. Si e belasting ta por ehempel 300 florin pa aña y nan ta paga 306 florin. Nan no ta paga 320 florin. Loke ta pasa ta cu nan ta bisa cu a bisa cu belasting no a cambia. Ta berdad esey, pero e gastonan a cambia di sticker pa gastonan di plachi. E suma total cu e persona tin cu paga e ora ey, si e ta paga pa mita aña e tin cu pone 12 florin acerca y si e ta paga full aña, e tin cu pone 20 florin acerca riba e suma di e belasting.
Loke ta pasa ta, hopi persona ta acudi cu nan a paga por ehempel 158 florin, siendo cu pa mita aña nan lo mester a paga 162 florin. E clientenan aki ta rabia, pasobra nan falta 4 florin pa paga. Tin caha habri berdad, pero te cu 3’or di atardi. Pa esnan cu ta bin anochi of despues di 3’or di atardi, ta dificil, pasobra e ora no por cobra e diferencia cu falta.
Ta e diferencia so ta cobra pasobra e clientenan a paga caba na banco. Si ta despues di e ora di 3’or, e ta bira hopi fastioso pa e personal di DIMP, y pa e clientenan, pasobra e ora no por cobra e paar di florin cu falta y esey ta causa frustacion.
E clientenan ta reclama cu DIMP mes a bisa cu e suma di belasting no a cambia. Ta splica nan cu e suma di belasting no a cambia, pero e gastonan adicional a gasta di stickerkosten pa plaatkosten. Esey si tin diferencia. Esey ta un di e factornan cu ta hungando un rol awor aki.
Tambe e procesamento di e pago. Ta wak e fecha. Semper ta mantene cinco dia di trabao, ora cu un persona paga online, pa asina procesa tur e pagonan cu drenta.
Tin dos banco cu ta procesa mas lihe, pasobra cu e dos banconan aki, e sistema di DIMP ta comunica cu nan sistema. Esey ta Aruba Bank y Banco di Caribe.
E otro banconan, ainda e sistema di DIMP no ta conecta automatico cu nan y esey ta causa cu un persona cu a paga por ehempel un dia prome of dos dia prome, no por procesa su recibo ainda.
Esey ta un factor tambe pakico e personanan no ta gusta. Romano ta haci un apelacion na comunidad cu ta paga online, si por tene cuenta cu cinco dia di trabao, pa DIMP por procesa e pago. Pa loke ta trata Banco di Caribe y Aruba Bank, ta rekeri dos dia di trabao. Esey ta bay poco mas lihe, pa asina ora cu e cliente bin, ya DIMP tin su pago cu el a haci caba den nan sistema y por procesa su recibo. Awo ta print e recibo di biaha pa e persona.
Un di e otro factornan cu tin bottleneck cu online payment, ta e personanan ta haci pago via transfer. Nan ta haci transfer via nan account pa e account di DIMP.
Kico ta e parti fastioso di esey?
Den transfer bo tin un solo field cu bo ta yena bo datonan y si e datonan no ta completo, e ta bira hopi dificil pa por procesa e pago. Siendo cu den Bill Payment, si e personanan ta usa e sistema aki, e ora eynan e Bill Payment ta duna e fieldnan specifico, cu bo ta yena, esta e nomber, e persoonsnummer, e periodo di pago, kico ta e number di auto. E persona ta hay’e via Bill Payment, obliga di yena tur e fieldnan ey prome cu e submit su pago.
Den transfer esey no ta e caso. Den transfer tin un solo field y abo tin cu yen’e. Hopi persona no ta yena e datonan completo. E ora ta bira dificil cu DIMP no ta haya e datonan completo pa por procesa e pago. Esey ta un di e bottlenecknan cu nan tin. Tur esey ta rekeri mas tempo pa por check aki y check aya. Esey ta haci cu e tempo di espera, ora di online payment pa e personanan cu ta bin busca nan plachi, ta mas largo.
A haya basta critica riba esey. Tin completo comprension pa e ora largo di espera y pesey awor aki toch ta purba di scan tur e personanan cu a yega. Ta pasa controla nan papelnan, wak si acaso, si nan ta prome cu 3’or, ta pasa check si falta algo pa paga, prome cu caha cera.
Tambe ta cuminsa controla e suma cu nan a paga, ki fecha nan a paga, pa nan no keda tur e ora den rij. Romano a comenta cu e dianan prome a sosode cu tabata tin hende cu a warda hopi. Ora cu nan a yega dilanti, a resulta cu nan papelnan of pagonan no tabata corecto. Claro nan no ta keda contento, pasobra cu nan a warda asina hopi, pa bisa nan cu e pago no ta completo, of e fecha no tin’e ainda den e sistema. Ta pesey, ta pasando constantemente den e personanan cu ta wardando pafo, pa por splica nan esey, pa por baha e frustracion eynan y toch por yuda esnan cu berdaderamente por yuda e momento ey.
