Violencia domestico no ta descrimina, segun trahado social Maria Carrasquilla. E no ta descrimina si bo ta hoben, si bo ta di edad mas halto, si bo ta hende homber, si bo ta hende muhe.
Esakinan ta ora cu bo drenta den un relacion di pareha. Fundacion Hende Muhe den Dificultad bo por wak’e den hoben hasta. E caso di mas hoben cu nan a haya ta di un hoben di 14 aña.
E casonan mas tanto cu ta bin cerca nan ta mas tanto hende muhe, cu nan casa of pareha, hende homber. Tin casonan di pareha di mesun sexo y tambe di casonan di hende homber, cu ta wordo maltrata.
Esey, Fundacion tambe ta yuda y guia nan. E maltrato ta keda. Maltrato no ta descrimina, sea cu bo ta hende homber of hende muhe.
Awor aki no ta momento pa no keda keto mas. Ta momento pa bo para keto na bo mes y pensa con bo ta sinti. Con bo ta hibando e relacion aki, of con bo ta hibando bo bida actualmente. Esey ta pa cuminsa.
Una bes cu bo para keto na bo mes, no keda keto mas. Cuminsa bisa, cuminsa yega na un persona cu por yudabo, pero tambe e curashi eynan. Nos ta personanan hopi fuerte cu por sali dilanti. Por cay un biaha, pero por lanta uno y dos biaha mas fuerte.
Cuminsa busca ayudo, no keda keto mas, semper lo ta bay tin un hende cu lo yuda. No kere cu si bo ta den e buraco, cu bo ta kere cu bo no por sali for di dje.
Busca ayudo. Fundacion hende Muhe den dificultad tambe tey. Nan number ta 5865400. Por bay tambe riba nan pagina di Facebook unda cu por haci pregunta. Nan tey pa yuda. Tambe tin ora scol, of otro instancianan cu por ta bo ta mas cerca e momento eynan. Tin polis. No keda keto mas.
