Defensa di ex Minister drs. Paul Croes y Melony Croes-Paesch diaranson a trece diferente punto pa kita e percepcion crea door di Ministerio Publico di e “actuacion delibera di e ex mandatario contra trahadonan local, e mal uzo di su posicion, malversacion, labamento di placa y participacion den un organisacion criminal”.

Abogado mr. Marije Vaders di Corsou a splica Hues cu semper bay Ministerio Publico a papia di hopi, di algun mil y awo den Corte ta bisa cu esunnan cu a haya ontheffing a base di fabor of soborno ta “tientallen”. Pues un tono cu a cambia di e percepcion cu nan a crea despues cu a detene e ex Minister di Labor. Loke cu niun momento Fiscal a trece dilanti, segun e abogadonan defensor, ta cu Gobierno tabatin protocol firma cu cierto companianan cu automaticamente ta haya “ontheffingen”, por ehempel Refineria CITGO y Ritz Carlton Hotel & Casino, cu den un solo biaha a haya 200 dispensacion.

Algo cu a hala atencion ta momento cu Abogado Vaders a trece dilanti cu Ministerio Publico no a splica cu ora nan ta papia di e 2171 dispensacionnan cu a wordo duna, ta solamente 13 compania di e 895 empresanan cu a haya esaki, tabata sponsor of a haci un donacion e aña ey. Y, banda di esaki, mayoria di e 13 companianan ey den pasado a yega di haci donacion caba, sin cu nan a haya ontheffing.

Tambe el a bisa cu ora ta papia cu e Ontheffingnan ta hopi, nan ta haya lamentabel cu Fiscal ni e funcionarionan di Departamento di Labor cu a haci declaracion, no ta bisa cu cua otro cifra nan ta compara esaki. No tin datos di cuanto Ontheffing e Minister anterior a duna pa bisa cu esunnan den tempo di Paul Croes tabata hopi. P’esey no por compronde a base di kico Fiscal a yega na e pensamento ey.

Otro aspecto cu a wordo señala ta cu empleadonan di DPL y di Ministerio Publico ta bisa cu a perhudica e forsa laboral cu e tantisimo Ontheffingnan duna. A splica Hues cu e mandatario a crea un programa cu a pone 400 persona bek den e mercado laboral mientras cu e cifra di desempleo no a subi, pero a baha den e periodo di Paul Croes. “Con e por a perhudica e forsa laboral cu e ontheffingnan, manera OM ta bisa?” mr. Vaders a puntra su mes den Corte durante defensa di Paul Croes.

Comments

comments