Entrante augustus 2024 e alumno di klas 1 lo siña lesa y skirbi na Papiamento. A organisa un trayecto di preparacion pa asina ekipa e cabesante y e maestro di klas 1 di e scolnan basico (basisschool) cu e hermentnan necesario pa por implementa e parti aki di e maneho nobo di idioma den scol.
E trayecto di preparacion a cuminsa dia 17 di november 2023 y lo sigui te cu 31 di mei 2024. Den e trayecto di preparacion aki ta organisa comunidad di siñamento profesional. E maestronan ta forma parti di e comunidadnan aki den cua ta crea espacio pa conecta cu otro, intercambia e ideanan, construi material y comparti conocemento cu otro.
Parti di e preparacion ta encera analisis, revision y reproduccion di diferente material y e ampliacion di material digital. Ademas e trayecto di preparacion ta brinda e cabesante- y maestronan di klas 1 e oportunidad pa profesionalisacion. Dentro di poco lo cuminsa cu e trayecto dirigi riba e maestronan di klas 2 y otro actornan di cuido p.e. IB’ers.
E dianan di estudio ta tuma luga den consulta cu e directivanan di scol y bou guia di Departamento di Enseñansa Aruba (DEA) conhuntamente cu Centro di Desaroyo Profesional Continuo (CDPC) di Instituto Pedagogico Arubano (IPA).
Recientemente e cabesantenan di scol basico y e maestronan di klas 1 a participa na e di cuater dia di estudio cu ta forma parti di e trayecto di preparacion pa e implementacion di e maneho di idioma nobo. E ambiente tabata placentero na unda por a tuma nota di e entusiasmo, animo y dinamismo bou e cabesantenan y e maestronan di klas 1.
Algun grupo a desaroya material audiovisual, otro a dirigi nan mes riba material visual y otro a traha riba un plan di implementacion segun e necesidad di nan scol. Minister di Enseñansa Endy Croes tambe tabata presente y a comparti algun palabra di elogio.
Di parti di DEA y CDPC ta gradici tur maestro y cabesante cu tabata presente pa nan tremendo participacion.
