Tin un caso cu a yega na nos mesa di redaccion di cierto abuso di poder cu ta tumando luga na KIA, caminda cu un preso di inicial K. a wordo malamente bati door di e ekipo di K9 di KIA, djis pasobra a haya un tiki droga riba dje, unda cu a dun’e un castigo di 6 luna mas cera.
Esaki, segun e remitente, ta inaceptabel. Riba dje, a kita VI di e preso y a strob’e cu e no por a bay su cas. Loke ta mas lamentabel di henter e asunto aki, segun pareha di e P, kende a manda nos e informacion aki, cu nan a neng’e di bay hospital na momento cu el a wordo bati, pa no tin un rapport disponibel di e abuso cu a wordo cometi den su contra. Tampoco nan no a dun’e nada pa e dolor y a djis lag’e den cel benta. Despues di algun dia, a hib’e pa asina e haci un MRI.
Procedura di K9 ta, cu na momento di ristramento, nan ta pone e preso sak. Pero mirando e condicion cu e rudia di e preso particular aki, di dje tabata full hincha y door di e dolor e no por a sak. Aki tambe a neng’e di bay hospital. Dokter na KIA a bis’e pa buta ijs. E preso no por a cana y a keda sinta den rolstoel.
Despues di a roga pa casi 6 siman, landsrecherche a scucha su version y a apunta algo, sinembargo, no a tende nada mas. Awo un pedofil ta sali liber y un otro pa un tiki weed cu nan a hay’e cun’e ta wordo abusa di e manera ki y haya 6 luna cera. Esaki ta e ley di Aruba.
E tin 1 aña cera. Dia 1 di Augustus e mester a sali liber. El a wordo acusa pa tabatin marihuana na cas y tambe di tabatin un brommer cu nan a bisa cu ta horta. Pero e por a prueba cu el a paga pa nan. Dia 29 di Mei durante bishita, ora di bai cas nan a wanta’e y a bai cu ne. Nan a deten’e unda cu na e momento ey a bis’e cu nan a haya droga riba su pareha y cu ta el a dune siendo no tabata berdad paso a bisa nan cu a dun’e un usb. Anochi nan a laga e dama liber y e dia siguiente e preso a bel’e cu telefon di KIA y bisa kico tur nan a haci cun’e. Cu nan a bati’e y cu e no por cana e dianan siguiente. E tabata roga nan pa e bay hospital y mirando cu su pia tabata hincha, e no por a wanta dolor. Pero asina mes nan a keda nenge te ora cu nan a buta K9 cu ta esnan cu a bati’e, pa bay listr’e e y hib’e hospital. Nan a bise sak ora di search loke e no por a haci y a bis’e si e no sak e no ta bay, y cu e ta bai bek cel. Te cu dia di awe e no por a bay hospital
Despues di casi 2 siman e hefe di KIA a bin papia cun’e over di loke a pasa y el a bisanan cu e kier papia cu un hende pasobra ta abuso loke nan a haci cun’e
E dia cu nan tabata di hibe hospital, e tabata warda den un camber cu nan ta buta preso warda pa transport. Ora el a wak un bewakster pasa el a yam’e pa papia cun’e, e hefe di K9 a bin cerka dje bise cu e tin cos di papia cun’e, el a bisa e hefe e no kier papia cun’e, cu e kier papia cu e bewakster. E hefe di K9 a push’e y chok’e caminda e tabata riba kruk y di baina por a sikiera para drechi ni pa e defende su mes.
E preso, riba e dia cu e mester a bay hospital a pidi pa e bay cu CEA, pero nan a neng’e, bisando cu ta cu K9 e tin cu bay. Pero e preso no tabata kier a bay, mirando cu ta nan a bati’e y saca su rudia fo’i luga.
Ta di spera cu un investigacion bin pronto riba e caso aki.
