Na inicio di fin di siman tras di lomba un delegacion di Britannia encabesa pa Lisa Montero a subi avion rumbo pa Cali. E meta di e biaha ta pa un grupo di mucha U15 participa den algun wega cu ta forma parti di un torneo na Cali.
SV Britannia den continuo mehoracion di nan prestacionnan riba tereno a manda busca un coach for di Colombia. E Coach no solamente a duna algun training pero tambe a presencia algun wega oficial di e team hoben aki y a keda impresiona.Segun Lisa Montero, e entrenador Colombiano a keda asina impresiona cu e talento di e muchanan aki y a regla un invitacion pa e grupo biaha pa Colombia y durante un siman nan ta pa participa den un torneo cu ta tuma luga e siman aki na Cali, Colombia.
A haya apoyo di e presidente di Britannia, Cedric Weerleman, y cu ayudo di e entrenador Jorge a traha e plan di biahe. E delegacion ta consisti di en total 17 hungado. Den fin di siman a participa den diferente sesion di training y awe mainta ya caba e torneo ta cuminsa cu nan prome participacion durante dia.
Prome cu e biahe a pone extra training diadomingo pa nan por ta bon prepara pa participa den e evento. Tin algun participante cu ya caba ta den seleccion di Aruba y pa e otronan e ta bon momento pa participa den un torneo internacional. E bon durante e torneo aki ta cu tin bista di coachnan internacional tambe riba e grupo di atletanan di Aruba.
