Un rato pasa alrededor di 5:45 pm Peter Susebeek a termina cu e parti di interogacion na oficina di Landsrecherche situa den Vondellaan. Ta for di mainta cu a deten’e relaciona cu caso Avestruz. Ta sospecha cu Peter Susebeek tin envolvimento den delitonan di corupcion relaciona cu otorgamento di tereno hunto cu ex-Minister Benny Sevinger.
Manera ya ta conoci, no ta prome biaha cu Susebeek ta haya atencion di husticia. Abogado mr. David Kock ta representa e sospechoso Susebeek, mescos t’e caso cu Sevinger. Durante un entrevista exclusivo cu Kock, el a confirma su representacion di Susebeek y cu e caso Avestruz.
Kock no a declara mucho mirando cu awe tabata prome dia di interogacion pa su cliente na oficina di Landsrecherche. E abogado a enfatisa cu Susebeek ta trankilo y cu e ta pensa cu e interogacionnan lo sigui pa por lo menos dos pa tres dia mas.
Ministerio Publico a informa dia 2 di october 2019, dia cu a haci e huiszoekingnan, cu Landsrecherche hunto cu hues-comisario y den cooperacion cu Cuerpo Policial di Aruba, a tene entrada hudicial na diferente luga. E entradanan aki a tuma luga den cuadro di un investigacion penal di Landsrecherche pa posibel delitonan di corupcion y otro hechonan castigabel posiblemente cometi relaciona cu otorgamento di terenonan di gobierno.
Mas concretamente: E investigacion ta dirigi riba e pregunta si un of mas compania a obtene a base robes (un opcion riba) derechonan di erfpacht di terenonan di pais Aruba den e añanan 2009 te 2017. Ademas ta investiga e rol di ex-minister Benny Sevinger den esaki.