Diaranson atardi alrededor di 3:30 pm a sosode un accidente cu herido riba Sasakiweg. Ta net panort di rotonde cerca di Super Food, direccion pa Playa. Ta entre un pickup di tour y un aut’i huur. E aut’i huur ta numera V-946, color blanco y ta marca Chevrolet. E otro auto ta un Landcruiser color shinishi marca Toyota numera V-4424.
Segun informacion ricibi, e Chevrolet a dal un brake di golpi p’asina duna preferencia na algun peaton cu tabata crusa riba zeebrapad y e Landcruiser no a paga tino y a dal su tras. Den e pickup di tour tabatin varios turista sinta parti patras, di cual tres di nan a resulta levemente herida.
Ambulance a presenta pa check un cu e otro cu nan pero no tabata necesario pa hiba nan hospital, na sitio mes a atende cu e trio herida. Polis di trafico documenta e accidente djey a sigui cu su patruya.
E Chevrolet a ricibi basta daño material caminda e glas patras a kibra por completo, mientras e Toyota a haya algun rasca chikito.
