E asunto di scan ta birando un discusion nacional. Tin varios politico, entre otro pafo di parlamento y tur ta papia cu nan no ta di acuerdo cu e asunto di scanner cu gobierno kier pusha riba e comunidad, hunto cu esunnan cu ta na cabes di Conseho Electoral.
Den parlamento no tin sosten. Lider di Fraccion di AVP, a bisa cu nan tin un carta firma door di entre otro Daphne Lejuez y Ricardo Croes. Aunke cu Alan Howell no a firma, a bisa si den parlamento cu e no ta di acuerdo cu e cambio aki. Esey mester di sosten di 11 parlamentario pa haci e cambio den e ley aki.
Daphne Lejuez a pone su firma riba e carta cu a bay pa gobernador. E ta conta cu e carta tabata, mirando cu den un reunion Conseho Electoral a bin parlamento pa duna un splicacion y sugerencia di loke a bin cu ne, mirando cu e no ta algo cla.
Durante e reunion eynan, a bisa hopi cla cu esaki ta rekeri aprobacion di parlamento prome cu tur cos. Un cambio di ley y e proceso mester cana manera mester ta. Mirando cu nan ta siguiendo manera nada no a pasa y no ta dunando oido na parlamento, na e mayoria, e carta aki a sali pa gobernador. E parlamentario a sigui splica cu Conseho Electoral mester revisa bon kico ta e limitacionnan di e ‘noodwet’. A caba di mira cu nan a suavisa hustamente e reglanan di DVG, cu nan a kita e ‘samenscholing’. Si ta suavisando e rekisitonan di DVG, pakico aworaki ta bay uza e mesun ‘noodwet’ aki pa bolbe pone limitacion riba pueblo den cual por crea posibilidad cu nan voto no ta secreto.
Dado momento ley ta dicta specificamente ora cu tin e stembiljet y sali fo’i dje loket, e mester ta dobla den un forma cu no por mira nada. Awo ta bisa cu e votado ta drenta cu su stembiljet dobla, tin cu para tras di otro cu ta para na e scanner, habri e biljet hinc’e cabes abao, y hinc’e den e scanner pa e cay den urna. Awo imagina un persona cu ta nervioso of algo a pasa cu e biljet a cay cabes ariba, y tur hende por wak kico el a vota. Unda nos kier bay cu esaki y kico ta e balor agrega na final di dia, Lejuez ta remarca. No ta scapa tempo aki.
A introduci un transaccion adicional pa hinca e biljet den e bus. Awo tin cu para hunto, mirando cu ta un scanner lo tin pa cada urna. Esey ta nifica cu cada urna, pa cada 250 hende mester tin un hoki pa vota. Lo tin cuater hoki pa
vota y un scanner. E ora tin cu imagina cu hende lo tin cu warda tra’i otro pa scan. E ta bay tuma mas tempo. Adicional na dje ningun hende no a pidi pe. Si kier haci e conteo mas lihe, dicon no scan despues. Ora cu tin tur e papelnan, pasa nan door di e scanner. Si esey ta e idea su tras, si kier yega na e resultado mas lihe. E parlamentario no a tende ningun otro argumento
si no ta pa yega e resultado mas lihe y pa e hendenan cu ta traha na e urnanan pa nan bay cas mas tempran, ta e argumento uza. No a tende nada cu e scanner tin di haber cu COVID.
E parlamentario independiente a splica cu e kier mira realmente y con nan kier cambi’e. E no tin nada contra innovacion. E presidente di Conseho Electoral no a convence. Lejuez ta compronde cu tin cu bay cu tempo, pero no por hacie particularmente den un eleccion cu ta tuma luga den un temporada asina cortico. Ta crea un incertidumbre den pueblo, un insiguridad. Cua ta e balor agrega pa haci tur esaki y ta haya hende cu ta haya miedo. Ta stroba e electorado pa nan saca nan bos.
https://www.facebook.com/24ora/videos/945201299564273
