Minister Oduber a splica cu ta wordo bisa cu Lotto tabata den problema financiero cu hasta banconan local no kier a financia nan. Tabata manera un rescate nan a haya for di e grupo Canades. Esey ta loke ta wordo bisa. E documentonan cu e minister tin den su poder, ta wordo prueba lo contrario. Nan ta bisa cu durante periodo di gobernacion di MEP, tabata tin mal maneho.
Ora cu e gobierno nobo di AVP a sinta, nan a hereda un situacion cu nan mester a negosha cu e Canadesnan, pa salba Lotto, sino Lotto lo a bati bancarota. Esey ta e motibo cu a firma un contract asina cu ta beneficioso pa e Canadesnan, pero no ta beneficioso pa pais Aruba. E pruebanan cu e minister tin ta mustra contrario. Cu den 2011 tabata tin mal maneho y cu for di e tempo ey e contract a wordo renegosha. E no a wordo negosha na 2009, caminda cu tabata tin cambio di gobernacion. E dos añanan ey no tabata tin papia di mal maneho, sino di 2011 en adelante, eynan nan a cera e contract. Esey ta hopi condenabel, pasobra normalmente ora cu ta firma un acuerdo, bao di cualkier circunstancia cu bo por ta aden, bo ta firma un acuerdo pa tres of cinco aña. Den e caso di Lotto a firma un acuerdo pa 15 aña. No a mara e gobierno aki so, sino cualkier otro gobierno cu e contrato aki, cu no ta na beneficio di deporte, beneficio na comunidad di Aruba. No por ta asina cu tin un grupo cu ta maneha Lotto, nan ta strica placa, y deporte ta sufri den tur sentido di palabra.
Dangui Oduber: No por ta asina cu na Lotto 11 miyon ta bay pa Canada y 4 miyon ta keda pa Aruba
Dangui Oduber: No por ta asina cu na Lotto 11 miyon ta bay pa Canada y 4 miyon ta keda pa Aruba. Click e link pa mas https://24ora.news/2E0I4jH
Posted by 24ora on Thursday, May 9, 2019
E contrato aki ta uno dificil. E minister a bisa cu si en caso cu gobierno gana e caso y tin autoridaad bek riba e fondonan di Fundacion Lotto pa Deporte, prome tarea cu tin ta pa bay sinta na mesa cu e Canadesnan, splica nan e situacion cu no ta e ta aden, sino deporte, y wak si nan tin e disponibilidad pa renegosha e contract, na beneficio di deporte. Gobierno ta acepta cu ta un modelo di haci negoshi. Nan mas di gana placa. Esey ta e manera di haci negoshi. Pero no por ta asina cu tin un verhouding di 11 miyon ta bay pa Canada y 4 miyon ta keda Aruba. Ningun caminda di mundo ta acepta esey.
A bin di compronde cu te hasta e ex minister di deporte no tabata di acuerdo cu e contrato aki cu a wordo negosha door di e minister anterior, kende tabata ex minister Visser.
Tin interes
Tin hopi grupo a expresa interes pa si en caso Gobierno bin cu un fundacion nobo cu lo mester bay competi cu Canada. E acuerdo cu fundacion Lotto pa Deporte a cera cu e grupo Canades, por a cere cu cualkier otro operador cu ta den e negoshi aki.
Na Aruba tin hende cu tambe a mustra interes y no solamente awo. Ora cu bo ta haya e informacion di e gobierno anterior, bo ta repasa tur e documentonan cu a wordo entrega. Tabata tin discusion andando door di gobierno anterior cu diferente partner local cu a mustra interes. Tin partnernan di afo cu tambe a mustra interes. Pero ta bay pa esaki. Gobierno ta bay haci negoshi cu e partner cu ta dispuesto pa compromete su mes cu e fairshare mester bay pa deporte.
E partner cu no ta dispuesto pa haci esey, e partner cu kier bin djis gana placa y deporte no ta haya su fairshare, lamentablemente no lo cera acuerdo cu nan. Esey ta e condicion cu lo cerca como gobierno.
