Diaranson anochi e di 29 edicion di e Conferencia Annual di Turismo (CATA) a tuma luga den e prestigioso Hyatt Regency Aruba Resort, Spa & Casino. E tema central di CATA e aña aki ta e ‘Poder di Data y su influencia.’ Pa ora ta trata di tuma decision strategico y tacticanan preciso, Aruba Tourism Authority ta depende grandemente riba inteligencia di datos.
“E inteligencia cu nos ta obtene, principalmente di nos base di dato di 16 miyon registro di bishitante, ta permiti nos adapta miho ainda nos contenido, refina e recomendacionnan y mensahenan na nos bishitantenan, previamente y despues di nan biahe,” segun Sra. Tjin Asjoe-Croes a comenta durante su discurso.
Resultadonan fuerte
Den su discurso durante apertura oficial di CATA 2019, CEO di A.T.A. a elabora cu e resultadonan observa durante e ultimo añanan ta drastico. E crecemento promedio anual di yegada di bishitante pa Aruba tabata 4% durante e periodo di 2011-2018. Consecuentemente, e contribucion na economia di Aruba pa medio di ingresonan di turismo – cual ta un indicador importante – tabata tin un promedio di crecemento anual di 5% durante e mesun periodo aki. Y pa locual ta ingreso pa medio di camber disponibel (RevPar), e crecemento anual promedio ta di 7%.
Honor pa 35 aña di servicio: Miriam Dabian
Pa Aruba Tourism Authority ta esencial pa semper reconoce e perseverancia y dedicacion di e miembronan di su ekipo. Cada pasa dos aña A.T.A. ta reconoce su miembronan pa medio di e evento ‘YOU! Event’cu un medaya special pa tanto aña di servicio. Den cuadro di esaki, durante e apertura oficial di CATA 2019, CEO di Aruba Tourism Authority Ronella Tjin Asjoe-Croes a sorpresa Miriam Dabian (Director di A.T.A. pa e mercado Latino Americano) cu palabranan di elogio y aprecio y a entrege un medaya pa cu su aniversario.
Dabian, cu experiencia amplio riba tereno di turismo y mercadeo, tin 36 aña ta trahando pa A.T.A. y su liderazgo den e mercado Latino America ta fundamental pa e crecemento fuerte di dicho continente. Den su C.V. por mira con el a dirigi directamente e mercado di Colombia, Venezuela y actualmente ta desempeña como directora pa Latino America, un cargo cu e ta ocupa desde 2007. Durante luna di mei 2019, bao di su direccion e impulso di un strategia di marketing hopi diferente, oficina di A.T.A. Latino America a ricibi varios reconocimento importante den e premionan IAB MIXX 2019. Sra. Dabian a ricibi un reconocemento di honor (medaya cu logo di Aruba) diaranson anochi pa su 35 aña di compromiso, amor y dedicacion pa Aruba.
Comprometi cu mercado Latino Americano
Aruba Tourism Authority ta totalmente comprometi cu e mercado Latino Americano y hopi sigur cu e strategianan y enfoke conhuntamente cu e sosten di e socionan lo hiba na un aña 2019 y 2020 hopi exitoso. E conferencia aki ta ofrece un oportunidad balioso pa e socionan Latino Americano por relaciona y comunica cu e socionan clave di e industria riba nos isla, pero tambe pa disfruta di e desaroyonan cu a tuma luga durante e ultimo añanan na Aruba.
