Colegio di Curatornan di Universidad di Aruba a retira “en bloc”

E Colegio di Curatornan (College van Curatoren of Board of Trustees) di Universidad di Aruba recientemente a baha di forma unanime. Ta trata aki di e President-Curator, Juri Nicolaas (Hefe di Servicio di Inteligencia di Gobierno – VDA) y curatornan Miriam Gonzalez (Director na Banco Central di Aruba), Dolfi Richardson (ex-Korpschef di Cuerpo Policial Aruba y actual Hefe Seccion Interpol Aruba), Marielsa Arends-Croes (Economista di London School of Economics y Managing Partner na MGM Source). Otro miembro di e Colegio di Curatornan di Universidad di Aruba cu na November 2018 a retira caba ta mr. Jill de Cuba (abogado y partner di bufete Oomen).

Segun informacion cu 24ora.com a logra di obtene, e renuncianan aki a bini a concecuencia di tension cu Minister di Enseñansa dr. Rudy Lampe y su interes pa nombra otro personanan liga na dje. E ley cu ta reglamenta funcionamento di Universidad di Aruba ta stipula cu e Colegio di Curadtornan ta esun cu ta propone candidatonan pa e vacaturanan cu surgi den e Colegio.

Dr. Armando “Rudy” Lampe ta naci dia 13 di januari 1958, ta un Doctorandus den Teologia y un maestro den sociologia. El a participa den eleccion na aña 2005 pa prome biaha y a logra  2334 voto individual. Den e siguiente eleccion, el a bay atras drasticamente den voto y a logra retene 1360 voto. Den eleccion 2013 a bay atras cu mita di su votonan y a haya solamente 613 voto y den eleccion di aña 2017 a bolbe cay y yega te na 466 voto. Ironia ta cu ora a haya mas voto a bira Parlamentario y awor cu su popularidad ta mas abou cu nunca, el a yega na e puesto anhela di Minister di Enseñansa, Ciencia y Desaroyo Sostenibel.

No ta desconoci cu den tur nivel y tur organisacion den enseñansa na Aruba – for di Bureau Tra’i Merdia te cu Universidad di Aruba – tin descontento cu maneho di actual Minister di Enseñansa. E relacion entre e Colegio di Curatornan y Minister Lampe tabata cana hopi stroef for di cuminsamento. E Minister tin su mesun pensamentonan pa cu direccion y organisacion di Universidad y tambe pa cu e personahenan cu e kier forsa pa drenta den e Colegio di Curatornan. E retiro en bloc di e Colegio di Curatornan ta confirma e ambiente tenso entre Minister y e Colegio.

Dr. Glenn Thodé ta Rector di Universidad di Aruba, pero a prefera di no comenta riba e ultimo desaroyonan aki. El a confirma cu e Colegio di Curatornan a tuma nan retiro y awor lo mester apunta miembronan nobo. E no ta un decision cu Rectorado di e universidad lo mester tuma.

Na Universidad di Aruba por nota cu e figura hopi cerca di Minister Lampe y Partido RED, Armand Hessels, cada bes ta parce di ta fiha hopi di e actividadnan y lecturanan na Universidad di Aruba . No ta conoci si e persona di confiansa aki di Minister Lampe lo haya un posicion na Universidad of den e Colegio di Curatornan. Otro personahe hopi serca di Minister Lampe cu entrada di RED den gobierno a haya posicion ta Jan de Ruyter. El a haya un contract di Minister Lampe pa ta coordinador na Enseñanza pa Empleo. Minister Lampe tin un lista di personanan cu e kier pone awor na UA.

Armand Hessels, ta un di e figuranan yega na Minister Dr. Rudy Lampe y ta mencionando su nomber como un posibel candidato pa drenta e Colegio di Curatornan na Universidad di Aruba.

A realisa hopi trabao durante e ultimo añanan pa por a logra acreditacion internacional di e facultadnan di Univerisdad di Aruba. Tanto envolvimento politico den insititutonan serio sigur no ta bon pa enseñansa, ni tampoco credibilidad di nos sistema educacional cu tin un enlace cu universidadnan den region y na Europa.

Jan de Ruijter ta otro candidato potencion pa drenta e hunta di supervicion (College van Coratoren) na Universidad di Aruba. El a parece riba lista politico di Partido UPP na aña 2013 y a logra 14 voto. Awendia e ta hopi yega na Minister dr. Rudy Lampe.

Na momento cu a funda Universidad di Aruba bao tempo di Minister mr. Mito Croes (qepd) a pone hopi enfasis den e ley di formacion di Universidad pa e ta mas independiente posibel di gobernacion. Na momento cu a crea Universidad di Aruba a percura pa limita envolvimento di Minister den maneho y supervision. Awor aki tur cos ta mustra cu Minister Lampe kier reduci e autonomia aki di Universidad di Aruba.

Noticia relacionaMas for di e autor