Construccion dje parti nobo di hospital tabata un reto grandi. E proyecto a sufri mas di shete aña di retraso. A pone como enfoke pa termina e proyecto di construccion e aña aki mes.
Segun Dangui Oduber, Minister di Salud Publico, nan a tuma e decision pa enfoca di purba termina cu e proyecto di hospital e aña aki. E ta spera cu por termin’e den luna di november of december y lo ta entrega c’un budget di casi dos shen miyon florin. E ta convenci cu na final di dia pais Aruba ta bay paga p’e proyecto ey, pero por a construi dos of tres hospital completamente nobo.
El a indica cu e ta algo cu gobierno a hereda, di cual nan mester a purba maneha y deal cu ne. E proyecto aki no tabata esun di mas exitoso, e no tabata e miho proyecto, pero awo tin di enfoca pa entrega e proyecto aki.
Den e ultimo aña tabatin negociacion entre ministerio, AZV, ImSan y hospital riba cooperacion cu mester tin entre e dos institutonan aki. Hospital tabatin e pensamento ta miho fuseer e dos institutonan aki, pero Ministerio di Salud Publico no tabata di acuerdo cu esey. Incluso parlamento a presenta un mocion y tabata aproba unanimamente pa no fuseer, pero firma acuerdo di cooperacion. Esaki a tuma su tempo, mas di un aña di negociacion pero finalmente a yega na un consenso.
