Na 2020 pandemia di Covid-19 a dal mundo henter. Esey a hunga un rol grandi riba economia di tur pais. Gobierno di Aruba a haci prestamo di Hulanda y di aki a bin diferente condicion pa por a haya esaki. Gobierno a haci recorte den aparato gubernamental. Minister di Salud Publico a informa den conferencia di prensa cu a stop recorte di 5.5% den cuido medico.
Dangui Oduber, Minister di Salud Publico y Turismo, a expresa di ta contento y satisfecho cu ta duna bek e 5.5% di e recorte imponi na momento cu pandemia a cuminsa na 2020. E no tabata facil ora esaki a cuminsa na Aruba. Economicamente Aruba ta un di e paisnan cu mas tabata afecta p’e pandemia.
Pa Aruba por a sobrevivi, gobierno a haci un prestamo na Gobierno di Hulanda di 916 miyon florin. Na momento di haci prestamo, ta bin condicion cu no tur ora ta di acuerdo cu nan. Esakinan ta condicion cu ta dificil pa cumpli cu nan, condicion fastioso. Un di e condicionnan poni na momento di haci prestamo tabata recorte riba cuido medico di 60 miyon florin den pleno pandemia. Esey ta algo cu nan no tabata di acuerdo cu ne, tabatin diferencia di opinion cu Hulanda riba e recorte di 60 miyon.
Esaki ta bini pasobra e momento ey tabata pasa den momento dificil, pandemia di cuido medico. A impone esey y a laga gobierno cu tiki escogencia cu bay di acuerdo cu esey, pa asina por a yega n’e recorte di 60 miyon florin.
Despues di tempo dificil p’e sector di cuido, di cual nan tampoco tabata di acuerdo cu e recorte aki, nan no tabata di acuerdo tampoco cu e recorte di 5.5%. E recorte di 5.5% a drenta na vigor den 2020 y nan a keda coresponde cu gobierno pa haya sa ki tempo ta stop cu esey. E no tabata facil pa por a yega n’e fecha di awe, tabata palabra di e mandatario. Den 2023 gobierno a manda un carta na AZV pa informa riba e intencion cu e aña aki ta para e recorte di 5.5%. A pidi nan p’un conseho y traha riba e diferente escenario p’asina yega e decision cu entrante prome di mei ta para e recorte di 5.5%.
Pa mas lesa TREMPAN.COM.
