“Mi a conoce Benny Nisbet den añanan 80. Depues cu PPA a drenta
coalicion cu MEP na 1989 mi a acerca Benny hunto cu Luis Torres di ARX
Communications pa presenta un proyecto di Cable TV cu nos a traha
basta tempo riba dje”, asina e conocido comerciante Curt Harms ta
corda e politico cu a fayece ayera nochi na Hospital. E kier ta sigur
cu e politiconan hoben conoce e storia aki con Cable TV a yega Aruba.
“Nos a negocia cu Gobierno pa mas di 1 aña y mi mester bisa cu Benny
ta un hende hopi skerpi den negociacion y e tawata hopi bon prepara
den e materia. Na final nos a logra firma un acuerdo cu Gobierno y a
lanta Cable Television Of Aruba NV”, asina Curt Harms ta corda ainda.
El a sigui conta cu a cuminsa inverti mesora y a traha e red di kabel
cu awendia ta pertenece na Setar.
“Mester menciona cu Benny a para duro pa Tele Aruba entre otro haña
25% di accionnan di Cable TV sin pone 1 cen aden. A lo largo nos a
give in y nos a firma cu gobierno”, segun Harms ta relata. Mester
menciona cu si no tabata pa e acuerdo aki, Telearuba probablemente lo
no ta existi mas. Y pesey awendia Setar con cu bay bin mester sigui
inverti den nos planta nacional pasobra a hay’e den e pakete di Cable
TV ora Setar a cumpra e accionnan over.
Segun Curt Harms, siendo hoben ainda y cu hopi aprecio pa e deal cu el
a logra cera cu Gobierno danki na invervencion y decision di minister
Benny Nisbet, basta luna despues el a top’e y a puntr’e “Ben, kico mi
por haci pa bo y/of pa bo partido? Su contesta tabata: Curt mi lo
aprecia bo inverti den San Nicolas manera bo a inverti den
Oranjestad”.
Cu e contesta aki, Nisbet a diferencia su mes di mayoria politico di
nos isla, cu sin duda lo a contesta algo completamente diferente
despues di un deal asina. Curt Harms a aprecia e contesta sincero
asina hopi cu el a pone accion y cumpli cabalmente cu e peticion di
Nisbet. El a inverti casi 1 miyon florin den un tereno y edificio pa
un Circle K y un Dominos Pizza. A haci esaki no obstante cu San
Nicolas tawata un risico pa inversion e tempo ey.
“Sinembargo, e inversion a logra habri caminda pa mas inversion na San
Nicolas, entre otro un Burger King y un Kentucky Fried Chicken cu ta
precisamente locual Benny tawata kier a logra”.
E moral di e storia aki ta cu Benny como politico semper a pensa y
lucha pa Aruba y San Nicolas. “E probecho cu el a saca for di e deal
aki tawata pa Aruba y pa San Nicolas. Esey ta e Benny Nisbet cu ami
conoce. Kisas e ta un bon ehempel pa nos futuro politiconan hoben por
tuma. Sosega na paz Ben”, asina Curt Harms a termina skirbiendo riba
su pagina.
