Aruba ta cera aña 2021 cu un escandalo riba tereno di salud publico y ta habri aña cu un otro escandalo riba e planta di purificacion na Bubali plas. Segun media e planta di purificacion na Parkietenbos tampoco ta funciona. A bai asina leu cu diabierna ultimo ta mira e trucknan di chica pos pa basha awa sushi na e dump di Parkietenbos. Pakico mi ta bisa sushi? Paso e holor ta insoportabel fuera di e holor malo caba di dump.
Despues cu a regala Citgo 175 millon dollar, tin 84 miyon florin paga di mas na fase y awe Aruba ta confronta un problema grandi pa falta di vision. Un gobierno cu ta goberna manera un bol di hilo tur bruha. Un gobierno sin pia y sin cabez. Pakico nos di partido Curpa ta bisa esaki? Un gobierno cu a sinta na September 2021 y te cu awe nan no por a ni regla nan carteranan ministerial esta e Landsverordening Instelling Ministeries. Awe den 2022 e ministronan tin e carteranan acorda den 2018 paso e L.I.M. ta na Parlamento pero ainda no a wordo trata.
Tin placa pa tur cos pero no tin placa pa drecha e plantanan di Bubaliplas ni di Parkietenbos. A traha un rapport for di 2019 te cu awe no a hasi net nada pa remedia e problema y esaki a causa cu e lama rond di Aruba ta contamina. Ora cu a mira cu gobierno no kier actua a publica e rapport aki. Pa colmo ayera nochi a mira cuanto awa contamina cu ta sali for di Bubaliplas ta bay lama. No ta conciente cu Aruba su turismo ta basa riba e strand bunita cu nos tin. Nos unico pilar economico y gobierno no tine na pecho.
Cada dia cu e gobierno aki keda mas grandi e problemanan aki na Aruba ta bira. Nada no ta pasa por nada. Ora bo ta bay contra leynan di Dios bo no por spera otro. Locual cu bo sembra lo bo cosecha y esaki ta e cosecha di e gobierno aki. Nan ta rondona pa confucion.
Un gobierno cu no tin un lista di prioridad y Aruba tin un reto grandi su dilanti. E luna aki mester trata e presupuesto 2022 y tampoco no ta mustra nada realistico paso unda ta bay tin deficit di 400 millon pa jega na un presupuesto di 1.6 biyon florin.
E gobierno aki for di 2018 a pospone e bahamento di gasto riba empleadonan publico y na 2020 a bin cu e medida di 12.6%. E realidad di bida ta cu nunca a pone un personeelstop. Aña pasa parlamento ta aproba e maneho di gobierno pa emplea 152 persona. Despues di a firma e protocol di e diabierna scur di 13 di November 2020 na aña 2021 no e ehecuta ningun acuerdo y awor nan ta lomba contra muraya paso aki un paar di luna lo no tin placa mas.
Segun informacion tin un grupo di hulandes y tin arubiano den dje cu ta na caminda pa tuma over. Si ta asina ban spera cu e fiesta lo caba y lo ta fin di e gobierno aki. Mester un lista di prioridad y plan pa ehecuta a corto plazo. E planta di waterzuiveringsinstallatie segun nos por a compronde mester di 60 miyon florin pa renobe y esaki ta urgente.
Nos di partido Curpa lo sigui vigila e asunto aki di acerca
Lider di partido Curpa
Eric Ras
