GLW Foundation ta organisa pa di 6 aña consecutivo su benta di cupcake “Cupcake di Speranza”. Manera ya a bira un tradicion, GLW Foundation organisado di Miss Teen Aruba International y Turismo Mundial y awor tambe Thick Madame ta organisa e di 6 edicion di su popular “Cupcake di Speranza 2021”. E aña aki ta dedica e benta na Shady.
Shady ta un hobencita di 9 aña y for di baby ta sufri di neusbloeding. Te cu 4 aña dokter di cas tabata considera esaki algo normal.
Dokter di cas a mand’e KNO arts y aki e specialista a vries cierto adernan den su nanishi. Desde e momento ey Shady su sangramento a empeora. Shady tabata sangra via horea y te hasta su awa di wowo. Cu 6 aña Shady a cuminsa cay flauw y semper manera e sangra su curpa ta haya manchanan blauw.
Cu 6 aña tur 2 KNO arts a trata Shady y a bolbe mishi den su nanishi. Aki ta unda tur cos a bira un pesadia. Shady tabata sufri di dolornan di cabes fuerte, sin forsa pa cana y tabata bay flauw y sangra mas hopi. Sin mas klompi sanger grandi den su boca.
Na inicio di 2019 Shady a biaha pa Colombia y aya a haya sa cu e tin Von Willebrand Factor 8. Shady su anemia tabata na un drempel peligroso. A haci 1 beenmerg suction y algun tratamento extra.
Ora el a regresa Aruba despues di 3 luna Shady a haya sintomanan nobo, por ehempel dolor di cabes cu e ta bay flauw, tur joints ta haci dolor, boca malo cu blaar, keintura sin motibo. Su pediatra a cuminsa sospecha riba diferente tipo di enfermedad pero testnan di sanger tur tabata sali bon.
Dado momento dokter a bisa cu e mayornan cu mester bay den exterior pa mas evaluacion, pasobra ta sigur cu Shady tin un auto immune disease pero nan no por saca afo ta cual.
Famia y algun amigo riba nan mes a cuminsa busca ayudo door di organisa cierto fundraising y aki a bin logra haya poco fondo pero ainda falta mirando cu e gastonan ta core riba mas cu 50 mil florin.
P’esey mes GLW Foundation cu su lema semper “Mas cu un certamen di beyesa” lo organisa e Cupcake di Speransa pa dianan 11- 12 y 13 di Februari 2021. Aki ta unda companianan y tambe individualmente por bestel cupcake den e forma simbolico di 5 florin pa Cupcake y di e forma aki tambe yuda cu e bon causa aki. Minimo pa ordo ta 10 Cupcake y por bestel cuanto cu ta desea. Pa bestelling por manda un whatsapp na 5616151.
