Un caso lamentable y tristo ta locual cu Jacqueline Cardoze ta pasando aden y cu awe mainta a presenta na nos mesa di redaccion pa expresa su angustia y haci un apelacion na comunidad.
Jacqueline a yega cu lagrima na wowo pa conta, cu pa awe merdia ELMAR lo kita su meter di coriente completo bay cu ne. E situacion cu e ta aden a cuminsa for di aña 2021, durante pandemia, na momento cu un cuenta di corienta a yega un suma di mas di 8 mil florin. Segun Cardoze a conta, esaki ta debi na recibo laga atras na momento cu algun persona cu tabata huur apartamento, a konkel cu e meter di coriente.
Un suma haltisimo di 8.052,74 florin laga atras pa paga door di doño di cas. Desafortunadamente doño di cas a fayece y pa nan keda cu e meter di coriente Cardoze, cu na e momento ey tabata e unico cu un entrada ( bijstand), a tuma esaki over. A purba yega na un areglo di pago di cual tabata casi imposibel pa un persona cu ta ricibi 500 florin di bijstand.
E tabata encarga pa cuida e cas como tambe e persona cu a fayece, pesey famia a brind’e e espacio pa keda biba na e cas y asina un yuda otro. E gasto financiero aki nunca nan a premira.
Situacion a cuminsa bay hopi mas atras na momento cu no por a cumpli mas cu e areglo di pago y ta enfrenta cu e informacion cu lo bay kita e meter di coriente. A pasa diferente instancia como tambe mandatario pero sin resultado ni ayudo alguno. Desesperacion ta algo cu por describi locual cu Jacqueline ta sinti na e momento aki.
Jacqueline, cu hopi berguensa pero cu un curason kibra y sin por mira un solucion a acudi na 24ora, como e media di mas grandi, pa asina haci un yamada na comunidad pa dun’e un man. Su situacion financiero ta hopi dificil na e momento aki, e ta pasando den hopi nececidad pero e no ta pidi pa su mes. Su apelacion ta un yudansa pa e por cubri e gasto di ELMAR y asina por hala un rosea y para bek riba su pia.
E no tin telefon pero por localis’e na Pindastraat 59. Jacqueline a informa cu su deseo lo ta pa si cualkier persona, compania of instancia lo desea di brinda un ayudo, cu por haci un pago na e cuenta di ELMAR pa asina e por logra baha e suma. E cuenta ta na nomber di Johnny Tromp, Pindastraat 59. Number di cuenta ta: 526703-1027937.
Humildemente el a expresa su mes na un momento hopi dificil den su bida. E no ta facil tur locual e ta pasa aden y sa cu tin hopi problema social riba nos isla pero si tur porta cu el a presenta na dje a cera p’e, e no a mira otro forma den su tristesa, cu pidi ayudo na comunidad. E ta gradici di awo caba un y tur cu lo por brinde e ayudo aki.
