Pieter Susebeek Jr. ta masha contento, segun abogado David Kock, kende a agrega cu el a haya un veredicto husto y corecto. E tabata den e mesun liña di e defensa cu a hiba casi tres siman pasa.
Manera ta conoci, e asunto aki tabata un ‘bijvangst’. Den un entrada hudicial (huiszoeking) cu a haci relaciona cu e caso Avestruz, polis a bin haya un cantidad grandi di placa cash den un kluis. A indica na autoridad cu e placa aki tabata di e cliente di Kock, mirando cu e ta un hungado di poker profesional y hasta internacionalmente.
Pa motibo di siguridad, un parti di e placa e tabata ward’e den kluis di e oficina di su tata. Ministerio Publico a bay riba ful un otro buelta, purbando di link e placa aki cu caso Avestruz mirando cu e tata ta envolvi den dje. Maske cuanto informacion, prueba y sosten di potret, declaracion di otro hungado cu a trece dilanti, Ministerio Publico simplemente no tabata kere Susebeek.
A cuminsa den pasado pa haya e placa bek, tempo cu e ni tabata sospechoso ainda. Ministerio Publico su reaccion tabata pa hacie sospechoso, cual a blokia e dunamento di placa bek. A dagvaard Susebeek. A acus’e e ora cu e placa tabata procedente di un delito y e ora lo a haci su mes culpabel di labamento di placa. E ta un desaroyo preocupante, si automaticamente Ministerio Publico ta haci conclusion asina ora cu nan a haya un persona cu un cantidad di placa y e persona ta duna un splicacion.
Naturalmente no por t’asina cu tin un cantidad grandi di placa y no por splica di unda e ta bin. Pero si e splicacion ta rasonabel, pasobra e no mester ta zuiver. Y si e ta rasonabel, Ministerio Publico mester prueba cu e placa ta procedente di delito.
Pa un cobertura completo di e caso y e sentencia di awe, lesa e edicion di TREMPAN di mañan.
