Nos ta den e ultimo siman di Carnaval 2020 y hopi hende ta comenta cu sea cu e carnaval no ta mes grandi cu aña pasa of banda di caminda no ta mira e mes cantidad di mirones manera aña pasa. Carnival ta un fiesta dushi cu hopi hende ta gusta pero banda di esei tambe ta duna hopi problema social.
Pesey nos ta mira e fundacion y instancianan ta plania con pa ataca loke ta e droga, alcohol, embaraso hubenil, malesanan transmiti sexualmente (STDs) violencia, violacion, maltrato y abuso sexual di mucha y sex. Lo ta bon pa nos tur por scucha y haci caso na e problemanan aki pa evita nos mes den nan. Droga, alcohol, embaraso hubenil, malesanan transmit sexualmente (STDs) violencia, violacion, maltrato y abuso sexual ta un problema mundial henter e aña y nos tambe tin e problemanan aki henter aña y carnaval ta contribui den un gran parti.
Corda cu e muchanan ta mira riba esnan mas grandi pa nan imita. Si adultonan comporta nan mes riba e puntonan aki lo juda cada mucha pa comporta nan mes tambe y no bay imita esakinan ni awo y tampoco den futuro. Mester cuida e muchanan den caso di abuso sexual , maltrato y tambe den negligencia. Corda cu un daño no ta facil pa recupera ni tampoco e daño di violacion contra di bo boluntad. Pa loke ta trata embaraso hubenil mester berdad laga e hobennan sa cu sex ta un responsabilidad y bo mester tin un edad pe y si bo no haci e responsabel anto bo lo por sali na estado y tambe haya malesanan transmiti sexualmente pero nos no mester laga afo y pone un indruk riba abstinencia.
Si bo abstene bo mes bo no tin nada di preocupa. Si bo keda sin haci sex bo no lo sali na estado, bo no lo haya malesa transmiti sexualmente, bo no tin nodo di pensa riba e efectonan di e malesa y ki malesa bo haya. Pero si encaso cu bo a scohe toch pa haci e sin usa proteccion y bo a haya malesa corda bay dokter di biaha y papia cu un adulto. No bay sinti berguensa y wante secreto pasobra e malesa ey no a bin pa bishita sino mas tempo bo keda sin trate mas peligroso e ta bira pa bo bida.
Si bo sali na estado pasobra bo no a haci caso pa proteha bo mes ta hopi decision bo lo tin cu bay tuma den un solo biaha. Corda cu hopi mucha homber no conoce e palabra cabayero. Masha hopi mama soltera tin unda cu e muchanan ta lanta sin nan tata. Na Merca so mas cu un miyon di hoben ta sali na estado tur aña y 60% ta sin casa, dus nan ta mamanan soltera lentando nan yiu nan so. Si bo ta bay keda cu e yiu y bayendo scol ta hopi duru y un yiu ta caro. Unda bo ta bay haya e placa pa cria e mucha? Ta hopi sosten bo tin mester.
Si bo no kier e mucha ta dos cos bo lo tin cu bay pensa riba dje ta adopcion of aborto. Practicando abstencia e unico cos cu abo lo pensa riba dje ta bo les y caba bo scol pa un bon futuro mañan. Den futuro semper un yiu ta un bendicion on unda cu abo ta cla pa duna bo yiu e bida cu e merese. Pa e mucha hombernan tambe corda cu mucha muhernan tambe lo por instisti riba bo pa haci sex pero si abo para pa e mes motibo cu un mucha muher mester para p’e anto bo tambe no mester traha un yiu cu abo tampoco ta cla p’e y haya malesa cu mucha muher tambe por tin y pega bo cun’e.
Pa loke ta droga y alcohol tambe si bo wak rond e bida perdi, e bida ey mes ta mustra bo cu si bo mishi cu alcohol y droga ta e bida perdi ey abo tambe por bay tin. Violencia nunca ta bon. Ningun clase di violencia inclui violencia domestica. Corda cu tin delitonan cu ta contra di ley cu abo por bay cera y sentencia pa prison pa hopi aña. Abo lo laga un likido, un puiru, un blachi y bo man haci bo perde bo libertad pasobra abo a disidi di door di nan bo a comete actonan contra di ley y haci otro bira bo victima? Nos mester pensa riba nos propio bienestar y e bienestar di otro tambe. E mensahe no ta solamente pa e hobennan sino adultonan tambe. Biba sano y comporta bo mes ta e miho manera pa no solamente gosa di carnaval pero gosa di bo bida henter e aña tambe y despues.
Cu Dios yuda nos ora cu cada problema bini na claridad y spera cu nan no ta grandi pasobra si e ta un mes e ta wordu agrega na e cifra di problemanan cu ya nos tin caba. Mayornan, cuida boso yiunan. Papia hopi cu e hobennan. Hobennan, boso scucha pasobra boso tin henter un futuro boso dilanti.
Cu Astrid bisa Mi: “Bo Programa Social” Sintonisa mi di dialuna pa diabierna na mega fm 88.1 . Orario:5 pm – 6pm y tambe live via facebook page: Aruba human rights for all ta desea e Pueblo di Aruba pa gosa sanamente di Carnaval 2020.
