Den fin di siman Cruz Cora a yama su grupo di boluntario hunto pa cuminsa cu nan preparacion den caso cu yama nan pa duna un man den un crisis relaciona cu coronavirus. Marla Thiel Dominguez, coordinador y Team Leader di training di Cruz Cora, a splica con e boluntarionan a haci nan preparacion den fin di siman.
Durante tres dia largo a trece e boluntarionan hunto pa prepara nan riba diferente aspecto, pa nan ta prepara si nan wordo yama aden. Asina por ehempel despues di e parti teoretico, riba e ultimo dia a train den bisti e trahenan special, con nan mester seya nan mes pa evita di keda contagia cu e virus si nan bay yuda hendenan infecta. “nos no ta bay hinca un boluntario den peligro, sra. Thiel Dominguez a bisa.
P’esey, ademas di siña con nan mester ta prepara prome cu bay brinda e ayudo, tambe a entrena nan kico pa haci despues. Mester limpia e ambulance ora cu e yega base bek, pero tambe con pa kit’e. Esaki ta un procedura special y decontamina, unda cu nan ta pasa den tres fase di desinfecta y deshaci di e traha, un procedura cu ta tuma rond di mey ora.
Nan tin suficiente material den stock pa e boluntarionan, cu nan a haya for di Hulanda. Kico ta bay ta e rol di Cruz Cora den un crisis no ta conoci ainda, pero e ta algo cu ta wordo dicidi door di e comision instala door di Gobierno.
