E siman a habri cu mas caso di Covid-19 presente na scolnan. Despues di Sint Anna School na Noord y EPB, awor e coronavirus a yega na scolnan den e bario di Pos Chiquito y Bisindario.
Awe a sali un carta pa mayornan unda ta informa mayor di studiantenan di Colegio Santa Famia cu tin un alumno cu a test positivo pa Covid-19. Mesora e mayor a informa e cabesante, kende a reuni cu su cuerpo di docente.
Mirando cu e mucha aki ta den klas 1-A, a dicidi di manda henter e klas den cuarentena pa 14 dia, y obligatorio. A tuma e medida aki pa motibo cu e mucha en cuestion tabata na e scol 48 ora prome cu el a desaroya e sintomanan. Un decision, segun scol, tuma den consulta cu DESPA y DVG. E 14 dianan aki a cuminsa conta for di dia 11 di september. Apesar cu nan ta den cuarentena, e muchanan lo sigui ricibi nan les na cas.
A pidi mayornan pa monitor nan yiunan pa cualkier sintoma y informa scol di biaha.
Riba Facebook por a mira cu un mayor a haci un denuncia publico cu e mucha contagia tin un otro ruman cu ta bay e scol ey y e ta sigui bay scol normal. Den e carta pa mayornan no a menciona nada di esaki.
Mientrastanto na e Kleuterschool di e bario, esta Kukwisa Kleuterschool situa na Spaanslagoenweg, tambe tin un caso di coronavirus. Un juffrouw di un di e kleuterklasnan a test positivo y ayera a informa cabesante di e scol aki. A tuma e mesun medidanan di precaucion.
Na e dos scolnan di e bario aki tin rond di 200 mucha ta ricibi nan educacion.
