Departamento di Salubridad Publico di Aruba (DVG) a informa un rato pasa cu awe ta e dia record den cantidad di casonan positivo di Coronavirus na Aruba. Ta obvio cu e contagio local ta tumando un dimension diferente na locual nos lo ta desea. Den esaki Aruba no ta para su so, pasobra madre patria Hulanda a confirma cu awe, riba un solo dia, tin no menos di 1542 caso positivo nobo, un record. Mientras cu mundo henter ta pendiente un vacuna pa baha e contagio y elimina e virus aki, tanto na Hulanda como na Aruba ta parce cu contagio local ta bayendo fo’i control!
Segun resumen di awe por tuma nota cu 66 persona mas a recupera, pero di otro banda tin 176 caso nobo di Covid-19 registra di cual 1 ta no-residente. Cu e realidad nobo aki di awe, nos casonan activo na Aruba a alcansa 1630 persona. A haci un total di 599 test ayera, di cual 535 test a wordo haci na laboratorio di hospital bou residentenan. Separa di e aumento den casonan positivo y activo, tambe DVG a confirma cu a bin dos caso fatal mas, pa cual e cantidad di mortonan relaciona cu Covid-19 a yega 22.
Hospital a informa cu tin un total di 40 persona interna di cual 11 ta den cuido intensivo y 29 ta isola riba piso general. For di augustus cu e brote a inicia na Aruba por tuma nota cu e porcentahe di casonan positivo relata na e cantidad di test haci pa dia ta keda varia entre 25% cu 40%. Mas test haci riba un dia, mas resultado positivo ta registra.
Loading…
Reload document 
Open in new tab 
