Siman pasa diabierna e chauffeurnan di bus chikito a presenta dilanti minister Ursell Arends pa mustra nan preocupacion cu diesel ta subiendo. Den seis luna a mira cu esaki a subi casi e dobel.
Vanessa Tromp, chauffeur di bus chikito, a bisa cu nan a bay pidi aumento y nan ta keda, pero awo nan no por mas. Hopi hende ta keda keto, pero tur dia ta pleita den nan mes y cu no por make it. Esey a pone cu nan a presenta na Bestuurskantoor. E dia ey, e mandatario a bisa di tuma nan carta y di compronde nan dolor. E contesta cu nan a haya ta cu otro luna diesel lo baha.
Tromp kier sa cu e prijs ta baha, pero cu tiki cen mientras den seis luna el a subi casi dobel. Asina mes nan no lo haya un alivio, pasobra diesel lo baha pero e costonan di mantencion, costo di bida no ta bay baha. P’e motibo ey ta pidi e mandatario pa duna nan un alivio cu e aumento di tarifa.
mr. Mike Eman, lider di fraccion AVP, a indica riba e carta manda p’e chauffeurnan di autobus na minister Arends ta hopi cla. E contesta cu e chauffeurnan a haya ta haci nan mas preocupa. Eman a reuni cu nan y a mira cu e dolor ta aumentando. E situacion ta birando mas sofocante tur dia pa nan.
Den e carta nan a pone bon cla kico ta e aumentonan cu a tuma luga. Na januari diesel tabata 1.95 despues 2.14, 2.28, 2.74, 2.84, 2.90, 3.12 na juli. Despues di seis luna diesel y gasolin a redobla cu casi cu e gastonan di esunnan cu ta stuur autobus a redobla, pero nan entrada a keda mescos. Dia 17 di juni, segun Eman, el a manda un carta pa minister cu tres preposicion p’e por reduci BBO ariba diesel y gasolin pa autobus y otro hende den transporte publico, pa pone e descuento di 10 cen bek. A alerta minister tambe cu si no tuma paso rapido, e punto logico cu ta bini fo’i autobus ta nan lo pidi aumento di tarifa.
Pa mas lesa TREMPAN.COM.
