Publicacion riba red social cu ta catalog’e como pedofiel, a pone cu e musico Claudius Philips a bay corte pa exigi un rectificacion. A pidi hues pa ordena Daury Rodriguez, e persona cu a divulga e informacion aki, pa rectifica e informacion, bisando cu e no tin prueba pa haci tal acusacion. Durante un ora largo hues a scucha e partido cu a inicia e caso aki, Philips y e contra partido Rodriguez, hunto cu su abogado mr. mr. Zuhaila Arendsz-Marchena. Na final a pasa un video den cual por mira un mucha muhe ta bisa cu Claudius Philips a mishi cu ne.
Abogado mr. Peter Mohamed, representando e musico, a splica hues cu a trata di yega na un acuerdo pafo di corte cu Rodriguez cual no a logra. “Mi cliente ta desmenti tur e acusacionnan cu Rodriguez ta menciona. E no tin ningun prueba. No tin keho entrega contra mi cliente y nunca mi cliente a wordo condena pa abusa di un menor di edad. E unico condena cu e tin riba su nomber ta posesion di pornografia infantil y pa esaki el a sinta su condena caba.”
E contra partido a bisa cu posesion di pornografia infantil ta igual na abuso di un menor. “Ta conoci cu pornografia infantil ta conduci na mas tipo di delito ….”, abogado Arendsz-Marchena a trece padilanti. Daury Rodriguez como tal a insisti den corte riba su acusacion di ta cataloga e musico como un pedofiel.
Na final hues a pidi pa mira e video unda cu un mucha muhe a declara cu Claudius Philips a mishi cu ne. A duna solamente nomber di e dama y a bisa cu ta prefera reserva su fam. “Bo conoce e denunciante aki?” Hues a puntra Philips. “E nomber menciona no ta uno cu mi ta corda of cu mi por bisa mi conoce.”
Dia 10 di augustus lo dicta sentencia den e caso aki. Pa mas informacion, lesa e siguiente edicion di TREMPAN.
