Na luna di september ultimo, e empleada Gina Luidens a haya retiro inmediato for di Aruba Airport Authority NV. Un ke otro tin di haber cu resultado di un test di droga realisa na trabou, den cual e empleada a test positivo pa uzo di cocaina.
Abogado Falconi a entama un caso sumario pa su cliente, mientras cu Aeropuerto a conta cu acesoria di abogado mr. Maura Brown. Hues a dicidi awe cu Aeropuerto tin rason, e test di droga ta legal y como tal e retiro “op staande voet” ta keda vigente.
Mester menciona cu e demandante a pidi Hues pa obliga Aeropuerto pa sigui pag’e su salario di September te awo. Tambe pa tum’e bek na trabou, sino un multa di mil florin pa cada dia cu no cumpli.
Luidens ta sigura cu e test haci dor di Medworks no ta bon. E ta sinti cu a manipula e resultado pasobra despues di esey a haci varios otro test y tur a sali negativo. E miembro di siguridad di Aeropuerto ta sigura di nunca a mishi cu droga, pues no ta compronde con e resultado por sali positivo.
Hues a considera tur e puntonan di ambos partido y na final e dicta na fabor di Aeropuerto y a condena Luidens pa e mes paga gastonan di e caso. No ta conoci si Luidens lo sigui bringa su caso awor den “bodem procedure”.
