Sin e acusado Gabriel Martien presente, kende a nenga di bay Corte, Hues a anuncia e veredicto den e caso Speeltuin unda cu a impone e mesun castigo cu Fiscal den nomber di Ministerio Publico a pidi pa e acusado.
E acusacion contra Gabriel Martien tabata asesinato y maltrato (pisa) di dos ruman homber menor di edad; maltrato di su compañera y mama di muchanan; y e delito di a sconde un curpa.
Hues na momento di lesa su veredicto a splica cu Ministerio Publico a pidi un castigo di 15 aña di prizon y e medida di TBS, cu cuido y bou guia. Tambe a pidi pa impone un castigo condicional cu el a haya den pasado.
E sospechoso a coopera den e investigacion penal y a duna un declaracion den cual pa gran parti e ta confesa su delitonan. Tambe el a mustra Polisnan unda e curpa di Eugene ta dera. Su declaracionnan ta wordo confirma via di declaracionnan di e otro sospechoso den e caso aki, testigonan (bisiña y amistadnan) y rapportnan di autopsianan, den cual e indole y cantidad di e lesionnan causa door di e sospechoso a keda señala.
Hues ta bisa cu Corte tambe a yega na e mesun conclusion. Den e caso aki e ta bay pa busca un castigo unda ta pone den balansa e derecho pa haya husticia pa e sufrimento cu a causa e victimanan y nan famia y di otro banda evita ripiticion, cu cual ta sirbi e siguridad di comunidad.
Psikiatra y psicologo a evalua e sospechoso y ambos experto a yega na e conclusion cu por papia di un problema di personalidad antisocial, cu caracteristicanan visibel di un psicopata. E ta considera menos responsabel pa su actonan.
Nan ta bisa tambe cu si no trata e sospechoso, cu e chens pa ripiti e hechonan aki ta grandi. Den pasado a resulta cu e sospechoso no ta compromete su mes facil pa wordo trata. Pa por tin exito den esaki, e lo mester haya un tratamento di duracion largo. E unico forma pa realisa esaki, segun e expertonan, ta den forma obligatorio.
Pa e motibonan aki nan ta conseha pa duna Gabriel Martien “TBS” cu cuido obligatorio, esta pone na disposicion di Gobierno (den combinacion cu un castigo di prizon).
Esaki, Hues a bisa, ta conduci na opinion di Corte cu no ta suficiente pa solamente impone un castigo di prizon incondicional, pero tambe mester tuma un medida pa pone na disposicion di Gobierno (obligatorio), pa evita cu den futuro e ta comete atrobe delitonan di violencia.
Locual hopi hende no a compronde ta, posiblemente e castigo aki ta di bida largo, cu e diferencia cu e mester sinta 15 aña den KIA (12 aña cu bon comportacion) y despues mester interne den un instituto cera, te dia cu psikiatra y psicologo determina cu e ta mentalmente stabiel pa drenta comunidad bek. Y si e momento ey no yega, e lo keda eyden pa semper!
