Diabierna mainta Corte a dicta sentencia den e caso penal contra Gabriel Martien, padrastro di e muchanan Eugene y Rishandroh, kendenan a fayece a causa di e golpinan fuerte (maltrato) ricibi na man di e acusado aki, mientras cu e mama a wordo acusa di no a interveni y di ta complice, hasta den sconde e curpa di su yiu.
Hues durante casi 10 minuut a lesa un sentencia den cual el a bay di acuerdo cu e demanda di Fiscal, cu ta e castigo di prizon mas e TBS, cu ta nifica cu e acusado aki ta bay wordo poni na disposicion di Gobierno y ta wordo interna di forma obligatorio, despues cu e sinta 10 aña di prizon.
Pa motibo cu e medida di TBS ta wordo impone pa delitonan cometi of ta un peligro pa un of mas persona, e duracion total di medida di TBS no tin un tempo maximo cu e mester keda bou di esaki. Cu otro palabra, si no tin mehoracion, e por keda den e instituto cera pa resto di su bida.
Den Corte, Hues a splica, cu a yega na e conclusion cu, banda di e medida di TBS cu cuido den un instituto di Gobierno, un castigo incondicional di 15 aña, manera cu a wordo exigi door di Ministerio Publico, ta na su luga. Den esaki Corte a tene cuenta cu e seriedad di e hechonan proba, e problema di personalidad di e acusado, e hecho cu e acusado ta wordo considera menos responsabel pa su actonan y e interes pa e acusado cuminsa cu su tratamento despues di no mucho tempo.
Corte tambe a haya cu no ta oportuno pa ordena ehecucion di un castigo condicional bieu, debi na e castigo cu e ta bay haya awo y e medida impone riba dje.
Na e momentonan aki Aruba no ta dispone di un clinica TBS. Ta papiando di creacion di un clinica TBS, pero por cuminsa pensa pa intern’e te ora cu e acusado a sinta por lo menos 2/3 parti di su castigo, pues no prome cu aki 10 aña.
Mientrastanto ta wordo investiga e posibilidad pa habri un clinica TBS na Corsou, pa esnan condena na Aruba, Boneiro, Sint Maarten, Saba y St. Eustatius. Si e clinica no wordo realisa, Aruba y Ministerio Publico mester investiga si e sospechoso, na e momento adecuado, por wordo ubica den un clinica TBS na Hulanda. Codigo Penal di Aruba ta ofrece e posibilidad aki.
Pa Corte ta inaceptabel pa laga e sospechoso bolbe den comunidad bek sin un tratamento obligatorio.
Mester bisa cu famia directo di e victimanan, Eugene y Rishandroh, no tabata presente diabierna mainta. E acusado mes tampoco y esaki no tabata prome biaha cu el a nenga di presenta na Corte.