Home » Minister Dowers tabata presente: A corta cinta di oficina renoba di ELMAR na San Nicolas

Minister Dowers tabata presente: A corta cinta di oficina renoba di ELMAR na San Nicolas

by Lis

Diabierna anochi, Minister di Energia, Husticia, Integracion y Transporte Publico, mr. drs. Arthur Dowers hunto cu CEO di N.V. ELMAR Edward Oduber a corta cinta pa haci e reapertura oficial di oficina di ELMAR na San Nicolas, despues cu e edificio a pasa door di un renobacion completo.

Durante e ceremonia, Minister Dowers a corta e cinta, marcando asina e reapertura di e facilidadnan renoba cu lo sigui brinda servicio na comunidad di San Nicolas y su districtonan cercano.

Como parti di e programa, Minister Dowers a ricibi un recorido den e edificio, unda a haya oportunidad di conoce e diferente facilidadnan y mehoracion cu a haci pa brinda un servicio mas moderno, comodo y accesibel na clientenan di ELMAR di pariba di brug.

Cu e reapertura aki, habitantenan di San Nicolas y vecindario por bolbe haci uzo di tur e servicionan cu ELMAR ta ofrece, den un ambiente renoba y cerca di nan cas, sin necesidad di bay ELMAR Oranjestad of Hato.

E ocasion tabata tambe un momento special, ya cu ELMAR a duna inicio na e celebracionnan di temporada di Pasco cu e iluminacion festivo di henter e edificio, cu a keda decora cu luznan di Pasco.

Minister Dowers a expresa su aprecio pa e inversion den e renobacion di e oficina, cu ta contribui na mehoracion di servicio na comunidad y ta reafirma e importancia di mantene facilidadnan accesibel y di calidad pa habitantenan di San Nicolas y vecindario.

E reapertura di e oficina di ELMAR ta representa un paso positivo den e esfuersonan pa sigui fortalece servicio na comunidad di San Nicolas.

Bo por gusta tambe

Adblock Detected

Please support us by disabling your AdBlocker extension from your browsers for our website.