Pa Corsou e fase tres lo drenta na vigor diamars 15 di september y esaki lo ta pa tres siman. Ta haci esaki pa frenta cu contagio di COVID-19 sigui plama. Den e ultimo dos fin di siman Gobierno di Corsou a ripara cu e cantidad di caso a subi y aworaki tin 14 cluster di casonan di Coronavirus.
Prome Minister di Corsou, Eugene Rhuggenaath a bisa cu ainda no por a detecta di unda esaki a bin y p’esey a bay fase 3. Desde 23 di augustus a bay na fase dos y a tuma diferente medida manera prohibicion di actividad publico, capacidad den localidad di 50% cu ta 250 persona. Tambe no mag tin aglomeracion y fiesta te cu 50 persona. Pero desde 5 di september a mira cu den fase dos esaki a escala.
Segun e mandatario den e di dos fase e cantidad di COVID a cuminsa subi. P’esey entratante mañan ta bin cu cambionan di cual no mas cu 4 hende den area publico, luganan ta habri te cu 10:00 di anochi y 50 persona pa establecemento. Pa loke ta den enseñansa no ta cera scol, pero den klas di grupo 8 bay ariba tin un maximo di 25 alumno.
Dia 17 di september lo tin toque de queda y esaki lo cuminsa desde 11:00 di anochi te cu 5:00 di mainta. Rhuggenaath a sigui bisa cu e transporte publico lo core te 11:00 di anochi. Desde awe ta duna espacio na tur instancia pa aplica p’e ontheffing cu ta dura par di dia pa keda cla, di cual nan por hay’e pa diahuebs.
Dr. Izzy Gerstenbluth a splica cu a haci 75 test y di eynan tin 4 caso positivo, pero dos di nan ta caso anterior y un hospitalisa. Te cu awo Corsou tin 102 caso positivo, 58 recupera y 1 morto. A splica comunidad di Corsou cu si e casonan sigui subi door di no sigui e protocolnan, nan no lo por handle esaki. P’esey ta pidi tur hende pa cuida otro, pasobra mayoria di casonan ta local y no importa.
