Publico ta abusa di ley di aglomeracion cu tin cierto buraconan cu no ta permiti funcionarionan policial actua di biaha na momento cu tin aglomeracion.
Den cuadro di aumento di casonan di Covid-19, autoridadnan local a introduci un biaha mas e prohibicion di aglomeracion. Esaki pa evita cu hopi hende hunto y cerca di otro na un sitio. Sinembargo Polisnan ta man mara pa actua.
Lito Lacle, di Departamento di Comunicacion y Prevencion di Cuerpo Policial, a splica cu articulo 3.1, cu ta papia specificamente di “samenscholing”, ta bisa cu ora bo ta 5 persona of mas, e hendenan ta haciendo algo cu ta castigabel. Pero e triki ta cu ley ta bisa tambe cu e personanan ta bira castigabel na momento cu un funcionario policial den uniform “bisabo bay for di e sitio y bo no cumpli cu esaki. Y esaki ta e wega cu publico ta hungando awo cu Cuerpo Policial.”
El a menciona e caso cu tabatin na Eagle Beach unda grupo grandi di hobennan a topa cu otro. Na momento cu e Polisnan a duna nan ordo pa bay for di sitio y nan cumpli, no tin hecho castigabel. E ta un situacion hopi dificil pa e funcionarionan pero pa e comunidad mes. E comentarionan por a scucha cu di e forma aki, ta plama e virus den forma di wega simplemente door di no cumpli cu e medidanan cu “samenscholing” ta prohibi.
E ordo aki ta hinca den un “ministeriele regeling”, awo ta keda na Gobierno pa hink’e di tal forma den otro, cu Cuerpo Policial por actua debidamente riba e prohibicion di “samenscholing”. “Nos mester di mas herment pa traha cu ne. Awo tanten cu nan sigui ordo di Polis, no tin un hecho castigabel.”
E tipo di comportacionnan aki ta bay defini no solamente e cantidad di casonan positivo, pero tambe e cantidad di mortonan cu tin pa dia. “Mas malo e comportacion ta, mas consecuencia e tin pa e mesun familiarnan di esnan cu e comportacion aki. Por ehempel e welo y welanan. E comportacion ta hopi importante pa “flatten the curve”.
