Algun siman pasa a tuma luga un caso den Corte entre e compania PMEC Project Management and Engineering Consultancy N.V. y CITGO Aruba Refinery N.V. E contratista a demanda CITGO pa pago di 3.2 miyon florin, pero e refineria ta bisa cu e no por paga debi na sancionnan di Office Foreign Assets Control (OFAC) di Merca. E ultimo aki ta impedi pa e compania Mericano transferi fondonan pafo di Merca, pa evita cu ta yuda e compania Venezolano PDVSA. Hues a mira e caso diferente y a ordena CITGO pa cumpli cu su debe.
E siman aki a circula un email di abogado mr. Gabriela Sjiem Fat na tur su coleganan, pidiendo pa posibel “steunvordering” di otro abogadonan den representacion di otro clientenan, relaciona cu su peticion pa “faillissementaanvraag” pa CITGO Aruba Refinery. Di acuerdo cu nos informacion, varios compania a uni na e caso aki caba, un den exterior y un local. Di acuerdo cu ley, mester di dos demandante pa haci e peticion pa declara un compania bancarota. Pues den e caso aki, ya tin tres. Ainda falta, locual ta sosode normal, cu ora Departamento di Impuesto (DIMP) tende cu tin peticion pa bancarota, mesora e ta bula den e caso y tin preferencia riba tur otro pa cobra locual CITGO debe.
Hues: CITGO por paga masha bon
Den e caso entre PMEC y CITGO Aruba a sali afo cu e formula legal con e compania ta hinca den otro, ta dun’e suficiente espacio pa logra paga su debenan na Aruba. E restriccion impone dor di Gobierno Mericano via OFAC riba CITGO no por ta e excusa pa no paga nada. Hues a analisa e structura di e compania, cu ta consisti di CITGO Aruba Refinery cu ta cay bou di CITGO Aruba Holding LLC, kende atrobe na su turno ta resorta bou di PDV Holding na Venezuela. E empresanan aki unda no tin restriccion di parti di OFAC y ta brinda suficiente espacio entre e companianan pa toch cumpli cu e creditornan.
Basta debe na Aruba
Fuentenan yega na e asunto a splica cu e caso aki lo por bira masha interesante y hasta historico, pasobra CITGO Aruba ta uzando e mesun motibo aki, pa no paga un cantidad di creditornan na Aruba. Entre esunnan cu e debe ta figura Refineria di Aruba NV (RdA) cu e mester paga 1 miyon dollar pa luna na huur di e terminal y tambe un minimo di 18 miyon florin pa aña na impuesto. E dos ultimonan aki no tabatin suerte pa cobra e debe aki pasobra for di aña pasa CITGO Aruba a hisa e bandera di no por paga ningun hende pasobra Gobierno Mericano a pone sancion riba nan: un excusa cu hues a desbarata for di mesa.
MOU lo cay na awa?
Pero…..net Gobierno di Aruba a caba di anuncia publicamente nan “intencion” pa firma un acuerdo, den forma di un MoU, cu CITGO Aruba Refinery relaciona cu nan contract cu Gobierno. Como cu nan no tin placa pa opera, no tin fondo pa cumpli cu trahadonan y pa opera e terminal, ta purba yega na acuerdo pa RdA mes tuma e terminal over tanten cu CITGO Aruba ta pasando dor di e momentonan dificil aki. Asina cu nan keda cla cu OFAC, cu nan por dispone di fondo pa paga e operacion na Aruba, nan lo haya e terminal bek pa por sigui opera. Pero, si Hues na Aruba declara e compania den bancarota, e ora no mester di e MoU mas ni tampoco mester sigui na mesa cu e compania pasobra simplemente su existencia a yega su final.
CITGO tin garantia di 150 miyon dollar
E compania madre di CITGO Aruba Refinery, esta CITGO Holding di Houston, a pone un garantia comercial di no menos cu 150 miyon dollar si acaso CITGO Aruba Refinery no cumpli cu su debernan na Aruba, entre otro habriendo e refineria y oper’e manera acorda den e contract firma cu Gobierno di Aruba. E suma aki por bay su tras, si CITGO Aruba Refinery keda sin cumpli. Awor aki caba nan ta den “breach” cu nan contract, dor di keda debe belasting, debe huur y no ta invirtiendo den e refineria pa un posibel reapertura. E proceso ey lo tuma un poco mas tempo, pasobra partidonan lo mester bring’e den un Corte di Arbitrahe.
CITGO no ta contento cu declaracionnan di Gobierno
Fuentenan den CITGO Aruba Refinery a sigura na nos cu e proceso pa firma e MoU awor ta parce mas dificil, despues di e conferencia di prensa di Gobierno, den cual Minister Presidente mr. Evelyn Wever-Croes a anuncia cu e MoU ta habri caminda pa habri combersacionnan pa busca un otro operador pa e refineria. Esey ta precisamente locual CITGO no kier, pasobra a acorda den e MoU preliminar di lo pasa e terminal over temporalmente pa RdA. Pues na ningun momento a papia di entrega nan derecho pa opera e terminal y e refineria, manera acorda na 2016. CITGO ta sinti awor cu Gobierno a papia un cos cu nan, pero ta bisando otro na comunidad.
